Eiríkur Rögnvaldsson, uppgjafaprófessor í íslensku, fékk nafnlaust skammarbréf sem hann segir einstaklega ósmekklegt og óviðkunnanlegt. Í bréfinu var talað um afa Eiríks.

„Það gerist sem betur fer ekki oft að ég fái nafnlaus skammarbréf í pósti en hefur þó komið fyrir – síðast núna í dag barst mér meðfylgjandi bréf póststimplað á Egilsstöðum,“ segir Eiríkur í færslu á samfélagsmiðlum.

Bréfið var nafnlaust og stutt. Þar sagði bréfritari að afi Eiríks birtist honum öðru hverju í draumi og hefði áhyggjur af framtíð íslenskunnar. Sagt var að afi Eiríks væri óánægður með hann og að vilji að hann skipti um nafn.

„Ég get ekki sagt að mér hafi brugðið illilega við en mér fannst þetta þó ekkert þægilegt,“ segir Eiríkur. „Mér er alveg sama þótt fólk sé ósátt við mig og mína afstöðu í ýmsum málum og er til í að ræða hana við hverja sem er hvenær sem er. En mér finnst einstaklega ósmekklegt og óviðkunnanlegt að blanda löngu látnum afa mínum í það mál enda fráleitt sem þarna segir, að metnaður hans hafi komið mér í embætti prófessors í íslensku – ég minnist þess ekki að við höfum nokkurn tíma rætt starf mitt eða framtíðaráform. Hættu að þvaðra um hann afa minn, segi ég nú bara.“

Eiríkur segist vera stoltur af því að heita Eiríkur og vera af Djúpadalsættinni. Hann telji sig ekki vera henni til skammar og hefur aldrei hugleitt að skipta um nafn. „En ég vona bara að bréfritara líði betur eftir að hafa losað þennan skít úr sálinni,“ segir hann að lokum.