Þar skrifar hún um „stóra plan“ Samfylkingarinnar fyrir kosningarnar sem fara fram eftir tæpar þrjár vikur.
„Stóra plan Samfylkingarinnar í kosningabaráttunni snýr að því að hækka skatta þó undir því yfirskini að eingöngu sé verið að tala um „þá sem hafi breiðari bök.“ Svo virðist sem spjótum Samfylkingarinnar sé þó fyrst og fremst beint að venjulegu, vinnandi fólki,“ segir Áslaug í grein sinni og bætir við að markmiðið sé að skapa þau hughrif að fjármagnseigendum sé hyglað á kostnað almennings í landinu, venjulegs fólks.
Víðir féll í gildru Stefáns Einars í Spursmálum – Svarar nú áróðrinum fullum hálsi
„Þvæld orðræða Samfylkingarfólks brýst út í hannaðri hugtakanotkun á borð við „ehf.-gatið“ svokallaða og „glufur“ sem frambjóðendur Samfylkingar vilja taka sig saman um að loka,“ segir hún og bætir við að ef litið er fram hjá „orðskrúðinu“ þá vilji Samfylkingin takmarka möguleika fólks sem stendur í eigin rekstri og telja fram launatekjur sem fjármagnstekjur.
„Forsendur tillagnanna hljóta því að gera ráð fyrir því að skattalegt hagræði fáist af því. Engu slíku er þó fyrir að fara og í raun eru þessu öfugt farið. Samfylkingarmaðurinn Víðir Reynisson heldur því fram í gær fram að hið meinta „ehf.-gat“ snúist um að jafna skattbyrði af 1.300 þúsund króna tekjum hvort sem þær fást greiddar sem launatekjur eða í gegnum rekstur einkahlutafélags,“ segir Áslaug í Morgunblaðsgreininni og bætir við að fjármagn sem tekið er út úr félagi sem arður beri þegar allt kemur til alls hærri skatt en hefðbundin laun. Nefnir hún dæmi máli sínu til stuðnings.
„Af 1.300 þúsund króna launum nemur virk skattprósenta 31% og fær viðkomandi 897 þúsund krónur í vasann. Greiði sami einstaklingur sér jafn háar tekjur í gegnum ehf.-félagið sitt þarf hann fyrst að greiða 21% fyrirtækjaskatt af hagnaði félagsins og svo 22% fjármagnstekjuskatt þegar fjármagnið er tekið úr rekstrinum. Í því tilfelli nemur virka skattprósentan 38,4% og fær hann 800 þúsund krónur í vasann.“
Áslaug segir að ekki verði annað séð af tillögum þeirra en að tilgangurinn sé að slá ódýrar pólitískar keilur.
„Slíkar æfingar höfum við öll séð áður í kosningabaráttu. Verra er þegar þeir sem standa í sjálfstæðum rekstri – langflestir í litlum fyrirtækjum – fá ekki að njóta sannmælis um framlag sitt til samfélagsins. Það eru gild rök fyrir því að píparar, smiðir, rafvirkjar, hárgreiðslumeistarar, bakarar og aðrir iðnaðarmenn stofni einkahlutafélag utan um þjónustu sína eða rekstur. Það sama má segja um forritara, ráðgjafa, hönnuði, bókara og fleiri,“ segir hún og bætir við að eftiráskýringar Samfylkingarinnar standist enga skoðun.
„Svo ég tileinki mér orðfæri Samfylkingarinnar, þá vill Sjálfstæðisflokkurinn stækka „ehf.-gatið“. Framtíðarsýn okkar er sú að auðvelda hugmyndaríku og drífandi fólki að stofna fyrirtæki og lækka skatta. Við eigum að bera virðingu fyrir vinnandi fólki og mikilvægu framlagi þess til samfélagsins. Við eigum að leyfa fólki að njóta árangurs af erfiði sínu, en ekki boða „plön“ sem þeim er síðan ætlað að greiða fyrir.“
