Per Erik Solli, sérfræðingur í varnarmálum ræddi um stöðu stríðsins við Norska ríkisútvarpið, NRK, og sagði að nú sé það í millistigsfasa þar sem lítið gerist í raun. Á nokkrum stöðum hafi stríðsaðilar náð að sækja smávegis fram en það séu árásir Rússa á innviði sem séu mest áberandi.
Hann sagði að Úkraínumenn hafi náð góðum árangri á vígvellinum á síðasta ári en seint í haust hafi sókn þeirra stöðvast.
Hann sagðist reikna með meiri hreyfingu á vígvelinum þegar vorið nálgast en nákvæmlega hvenær sé erfitt að spá fyrir um.
Hann sagði að á meðan kyrrstaða ríki á vígvellinum þá fái Úkraínumenn tíma til að fá ný vopn frá Vesturlöndum og þjálfa hermenn sína.
Hvað varðar næstu skref sagðist hann telja að Úkraínumenn muni hefja sókn á einhverjum tímapunkti og það besta sem þeir geti gert sé að gera öfugt við það sem Rússar reikni með. Markmiðið sé að koma á óvart.
Tormod Heier, prófessor við norska varnarmálaskólann, sagði að ef Úkraínumenn vilja hefja sókn sé best að hefja hana á meðan það er enn kalt og mikilvægt sé að þeir verði á undan Rússum að hefja sókn. „Svæðin eru stór og opin. Þegar þau frjósa er auðveldara að nota ökutæki með belti og fara um þessi svæði en þegar fer að þiðna að vori“ sagði hann.
