Rússnesk yfirvöld reikna með að 100.000 af þeim 300.000 hermönnum, sem voru kvaddir til herþjónustu nú í haust, falli á vígvellinum í Úkraínu fyrir næsta sumar. Margir þeirra eru sendir á vígvöllinn án þess að hafa fengið neina þjálfun eða litla þjálfun. Af þeim sökum reikna yfirvöld með miklu mannfalli meðal þeirra.

Þetta segir óháði rússneski miðillinn Vazhnyye Istorii og hefur þetta eftir tveimur óháðum og ónafngreindum heimildarmönnum í Rússlandi. Annar er sagður tengjast yfirstjórn hersins og hinn er sagður vera í leyniþjónustunni FSB.

En þessi háa tala er ekkert sem veldur rússneskum yfirvöldum áhyggjum. Heimildarmennirnir sögðu að það væru ekki rússnesk mannslíf sem muni stöðva stríðsrekstur Vladímír Pútín, forseta.

Heimildarmaðurinn hjá FSB sagði að áhyggjurnar af mannfalli séu svo litlar að yfirvöld séu reiðubúin til að senda nýja unga menn á vígstöðvarnar. Muni þeir, sem gegna herþjónustu, verða sendir þangað í stað þeirra herkvöddu sem falla.

Heimildarmaðurinn, sem tengist yfirstjórn hersins, sagði að varnarmálaráðuneytið undirbúi nú þjálfun 120.000 nýliða, sem munu gegna herskyldu, sem verði sendir beint í stríðið í Úkraínu til að koma í stað þeirra 100.000 sem reiknað er með að verði fallnir fyrir næsta sumar.

Heimildarmennirnir voru sammála um að Pútín sé reiðubúinn til að standa í stríði í mörg ár til að geta náð markmiði sínu um að ná Kyiv á sitt vald.

Einn liður í þessari áætlun er að þjálfa fjölda nýrra hermanna í kjölfar fjölda stórra ósigra Rússa á vígvellinum, nú síðast í Kherson.