Sigurrós Ósk Karlsdóttir varð fyrir einelti sem barn vegna fæðingargalla en hún er með vanskapaðar hendur sem hún fæddist með. Þegar hún var aðeins 5 ára gömul var henni boðið að láta fjarlægja vansköpuðu hendurnar og hún myndi þá fá gervihendur í staðinn.
Þrátt fyrir að Sigurrós hafi bara verið 5 ára gömul þá tók hún það ekki í mál. „Ég hélt nú ekki. Ég stóð á öskrinu og sagði bara: Nei,“ útskýrir hún í Dagur í lífi á RÚV.
„Þeir sögðu bara: „Ókei þá fær hún bara að átta sig á því sjálf þegar hún verður eldri, hvort hún vilji fá aðrar hendur þegar hún verður eldri“. En ég sé ekki eftir því, ég get allt eins og allir aðrir og ég er bara mjög sátt við það.“
Talið er að ástæðan fyrir vansköpuðu höndunum sé sú að móðir Sigurrósar hafi tekið svefnlyf á meðgöngunni, það er þó ekki staðfest. „En ég fór að kanna málið á sínum tíma og fékk ekki almennileg svör svo ég ákvað bara að láta kyrrt liggja. Var búin að sætta mig við að vera bara eins og ég er. Ég hefði ekkert haft það betra.“
Eins og áður segir var Sigurrós lögð í einelti vegna handanna og var skólagangan hennar því ekki auðveld. „Ég var náttúrulega lögð í einelti alla mína skólagöngu og ætlaði að fá mér frí í eitt ár en halda svo áfram. En þau hafa orðið ansi mörg, ég hef ekki farið í skóla síðan,“ segir hún.