Góðgerðasjóður Samherja, Samherjasjóðurinn, styrkti í vikunni söfnun Skógræktarfélags Eyfirðinga fyrir nýjum snjótroðara sem félagið hyggst nota í Kjarnaskógi við Akureyri.

Styrkurinn fellst í þriggja milljóna framlags í söfnun fyrir kaupunum á troðaranum auk þess sem sjóðurinn setur milljón í rekstur troðarans. Í tilkynningu á heimasíðu Samherja, segir að gert sé ráð fyrir að troðarinn verði kominn fljótlega á nýju ári.

„Samherji hefur frá upphafi veitt styrki til ýmissa samfélagsverkefna og þannig lagt sitt af mörkum til að stuðla að framförum í samfélaginu og velferð komandi kynslóða. Rík áhersla hefur verið á sviði íþrótta- og æskulýðsstarfs en þó einnig á stuðning við önnur almenn verkefni, oftast heilsutengd. Kjarnaskógur er útivistarparadís okkar Eyfirðinga og Skógræktarfélag Eyfirðinga hefur unnið þrekvirki með því að gera skóginn aðgengilegan almenningi allan ársins hring. Snjótroðarinn er einmitt stór liður í því að gera þessa paradís enn aðgengilegi yfir vetrartímann og þess vegna er svo ánægjulegt að taka þátt í þessu verkefni,“ segir Dagný Linda Kristjánsdóttir, stjórnarkona í Samherja í tilkynningunni.

Samherjasjóðurinn hefur áður styrkt vetraríþróttaiðkun á Eyjafjarðarsvæðinu ríkulega, en árið 2017 splæsti sjóðurinn í stólalyftu í Hlíðarfjall, að því er kom fram á heimasíðu Akureyrarbæjar.