Segja má að heiðarleg atlaga hafi verið gerð að Austurlandsmeti í bjartsýni nú síðustu helgi þegar ónefndur partíhaldari á Höfn í Hornafirði pantaði sér hljóðkerfi af fyrirtækinu Soundboks í Reykjavík, og vildi fá þau beint í partíið til sín fyrir austan.
„Sæl, er minnsti möguleiki í heimi að fá hátalara sendann austur á Höfn í Hornafirði? Erum með slappa JBL hátalara og ég var að kaupa Soundboks til að gera partíið aðeins skárra,“ skrifaði partíhaldarinn í tölvupósti til fyrirtækisins. „Ef ykkur tækist þetta yrði það epic,“ bætti hann svo við.
Soundboks birti tölvupóstinn á Facebook síðu sinni í vikunni, með leyfi sendandans. Þar kemur fram að pöntunin hafi verið gerð klukkan 23:30 á föstudagskvöld.
Það gekk þó ekki og þegar hátalarinn skilaði sér var partíið búið. Þá virðist hátalaranum hafa verið snúið við, sendur aftur til Reykjavíkur og skilað. Segja þeir hjá Soundboks að partíhaldarinn bjartsýni hafi þar með orðið sá fyrst til að nýta sér skilaréttinn sem þeir bjóða upp á. „Við erum sammála hr. X. Ef það hefði tekist, hefði það verið epic,“ segir jafnframt í færslunni.
Í samtali við DV segir Gunnar Egill Egilsson, eiganda Soundboks, að honum hafi þótt þetta skemmtileg tilraun. „Við bjóðum upp á mjög snögga heimsendingu, og 100 daga skilarétt. En því miður ekki alveg svona snögga heimsendingu,“ segir hann kíminn.
Færsluna má sjá hér að neðan.
