Gallup birti í dag þjóðarpúls Íslendinga en miklar breytingar eru frá síðustu mælingu. Fólk óttast ekki jafn mikið að smitast og er lítill kvíði fyrir efnahagslegum áhrifum vegna faraldursins til staðar. Engar tilslakanir hafa verið gerðar á persónubundnum sóttvörnum en fólk fer samt sem áður að færast nær gömlu horfi varðandi samskipti við fólk.

Samkvæmt þjóðarpúlsinum eru kossar og knús aftur orðin venjulegur máti til að heilsa þeim sem þú þekkir vel en þá sem þú myndir venjulega heilsa með handabandi fá ekki að upplifa það lengur. Frekar er því sleppt eða notast við aðrar snertilausar aðferðir.

Ferðir fólks á fjölfarna staði eða viðburði eru farnar að aukast sem og „óþarfa“ samskipti við fólk. Fólk verslar þó enn mikið á netinu og er það talið vera meira vegna þæginda frekar en vegna ótta um að smitast.

Fólk mætir meira í vinnuna en nemendur halda sig þó heima, þá sérstaklega háskólanemar. Sprittnotkun hefur minnkað, bæði þegar fólk sprittar hendurnar og þegar umhverfi fólks er sprittað.