Lögreglan á höfuðborgarsvæðinu hefur sent fjölmiðlum tilkynningu varðandi máls meints gluggagægis í lögreglunni sem mbl.is sagði frá í gær. Vitnaði vefurinn þar til orða Þórdísar Bjarkar Sigurþórsdóttur, íbúa í Hafnarfirði sem furðaði sig á að lögreglan væri að gægjast inn um glugga fólks. Tilefni heimsóknar lögreglu var, samkvæmt Þórdísi, að athuga hvort fjöldatakmarkanir sóttvarnareglna væru brotnar á heimilinu.
Sagði Þórdís í fréttinni einnig að nokkrir vinir sextán ára sonar hennar hefðu verið komin saman vegna skólaverkefnis en svo ílengst. Þórdís segir þar að lögreglumennirnir hafi komið um hálf tólf, og verið þegar mest var fjórir talsins. Þeir hafi meðal annars hindrað að Þórdís gæti lokað hurð sinni.
Í tilkynningu lögreglunnar vegna samskipta lögreglunnar og húsráðandans segir lögreglan að hún hafi verið á vettvangi að bregðast við tilkynningu um fjölmennt unglingasamkvæmi sem leiddi til grunar um brot á reglum um hámarksfjölda fólks á samkomu. Segir í tilkynningunni: „Við komu lögreglumanna á staðinn þótti sýnt að tilkynnendur hefðu eitthvað til síns máls.“