Margir settu sig eflaust í stellingar fyrir helgi þegar fréttir bárust af því að fjórða serían af hinum geysivinsælu Vaktarþáttum væri í undirbúningi. Landsmenn fengu fyrst að kynnast þeim félögum Georg Bjarnfreðarsyni, Ólafi Ragnari og Daníel Sævarssyni í sjónvarpsþáttunum Næturvaktin og síðan hafa bæst við Dagvaktin og Fangavaktin auk kvikmyndarinnar Bjarnfreðarson.

Sagt var frá því í Fréttatímanum á föstudag að Jón Gnarr, framkvæmdastjóri dagskrársviðs 365 væri að undirbúa fjórðu Vaktaseríuna síðar á árinu. Átti nýja serían að bera nafnið Öryggisvaktin og skarta sömu persónum og í þáttaröðunum og kvikmyndinni. Fram kom aðað Jón myndi þar af leiðandi vera í aðalhlutverki á eigin stöð og að vegna þessa hefði gerð fjórðu þáttaraðarinnar af íslensku spennuþáttaröðinni Pressu verið sett á ís. Einnig var greint frá þessu á vef Nútímans

Ragnar Bragason, leikstjóri þáttaraðanna og kvikmyndarinnar hefur nú tjáð sig á fésbókarsíðu sinni. „Að gefnu tilefni þá vil ég árétta að það er engin fótur fyrir þeim fréttum að ráðast eigi í nýja vaktaseríu. Þessi frétt um Öryggisvakt sem hefur verið á sveimi í Fréttatímanum og Nútímanum er argasta bull. Að öðru leyti eigiði hinn ágætasta dag,“ ritar Ragnar og endar textann með broskalli. Það er því óljóst hvort landsmenn eigi eftir að sjá meira af þeim félögum Georgi, Ólafi Ragnari og Daníel.