„Ég sá í gær hjá vinkonu minni að nokkrir bekkjarfélagar komu með hluta af sínu sælgæti sem og dót til að gleðja og gáfu dóttur hennar sem er að berjast við krabbamein og gat þess vegna ekki farið með í hús (en langaði mikið). Þau eru 8 ára.“

Þetta segir rithöfundurinn og sjónvarpskokkurinn fyrrverandi Ebba Guðný Guðmundsdóttir í stuttri hugvekju á Facebook. Mynd sem sonur Donald Trump deildi af dóttur sinni með sælgæti í fötu en gotteríinu hafði hún safnað á hrekkjavöku vakti gríðarlega athygli á Twitter. Þar hafði forsetasonurinn skrifað:

„Í kvöld ætla ég að taka helminginn af sælgætinu hennar Chole og gefa einhverjum krakka sem nennti ekki að safna sjálfur. Það er aldrei of seint að kenna henni gildi sósíalismans.“

Fór innleggið eins og eldur í sinu um samskiptamiðla. Dan nokkur Arel ákvað að svara og var með aðra nálgun fyrir Trump yngri:

„Taktu allt sælgætið af henni en gefðu henni einn mola. Éttu það svo allt sjálfur en eignaðu þér heiðurinn að hafa safnað því saman. Það er aldrei of seint að kenna henni hvernig kapítalisminn virkar.“

Bágborið líf

Ebba segir: „Hann er greinilega jafn mikill hálfviti og pabbi hans, Trump jr,“ Síðan rekur hún góðverk barnanna hér á landi sem söfnuðu sælgæti fyrir barnið sem berst við krabbamein. Ebba bætir við:

„Það er nefnilega aldrei of snemmt að kenna börnum að gefa með sér og hjálpa öðrum. En það getur hugsanlega á einhverjum tímapunkti verið of seint.“

Þá segir Ebba að lokum í hugvekju sinni:

„Líklega á maður að vorkenna fólki sem vill aldrei gefa með sér og hefur alltaf áhyggjur að ekki verði til nóg fyrir það sjálft, sama hversu mikið það á. Það hlýtur að vera andlega bágborið líf.“