Þáttaröðin Ástandsbörnin verður flutt á Rás 1 um páskana
„Þeir sem voru öðruvísi fengu að heyra það. Að vera ástandsbarn, kanabarn eða bretabarn eða hvað það var kallað, var sko alls enginn gæðastimpill. Langt því frá. Maður heyrði það líka frá fullorðnu fólki.“ Þetta segir Siguður Einarsson, einn viðmælenda Viktoríu Hermannsdóttur, í þættinum Ástandsbörnin sem verða fluttir á Rás 1 um páskana.
Sigurður er sonur bandarísks hermanns og íslenskrar konu en móðir hans var aðeins 16 ára gömul þegar hún átti hann. Hún eignaðist annað barn tveimur árum síðar sem hún þurfti að gefa til ættleiðingar vegnar sárrar fátæktar
Í þáttunum er Ástandið svokallaða, á hernámsárunum, skoðað með augum ástandsbarna, börnum íslenskra kvenna og erlendra hermanna sem fæddust á Íslandi á hernámsárunum. Mörg þessara barna þurftu að þola fordóma vegna uppruna síns. Sigurður er einn þeirra.
Heimilisaðstæður Sigurðar í æsku voru allt annað en auðveldar. Ungi hermaðurinn sem móðir hans hafði verið í sambandi með hvarf á braut og hún sat uppi með barn á sínu framfæri. Móðir Sigurðar bjó með móður sinni, sem var nýfráskilin við föður hennar, í hrörlegum bretabragga, sem voru verstu braggarnir og í þeim bragga sem þau bjuggu í skriðu rottur á milli þilja.
Saga Sigurðar og fleiri ástandsbarna er sögð í þáttaröðinni Ástandsbörn sem fluttir verða á Rás 1 alla páskadaga klukkan 10.15. Hægt verður að hlaða þeim öllum niður á hlaðvarpinu frá því að fyrsti þáttur fer í loftið, á skírdag.