Hleypur maraþon í svissnesku ölpunum til styrktar ungum, föðurlausum frændum sínum
Næstkomandi laugardag mun Eva Lind Helgadóttir, 37 ára gömul þriggja barna móðir, taka þátt í Jungfrau-maraþoninu sem fer fram í svissnesku ölpunum. Hlaupið er einstaklega erfitt því um er að ræða 1800 metra hækkun en vegalengdin er 42,2 km. Eva Lind hefur lítið hlaupið í gegnum tíðina en hún hóf undirbúning fyrir hlaupið í byrjun árs.
Við greindum frá áformum Evu Lindar í frétt þann 4. ágúst. Þar kemur meðal annars fram að Eva Lind hleypur til styrktar tveimur ungum frændum sínum, bræðrunum Sindra Dan og Snævars Dan Vignissona, en faðir þeirra Vignir Grétarsson Stefánsson lést um aldur fram þann 16. desember síðastliðinn. Vignir var margfaldur Íslandsmeistari í júdó.
Eftir hið sviplega andlát Vignis komst fjölskylda hans að því að líftrygging hans hafði ekki verið endurnýjuð. Þá ákvað Eva Lind Helgadóttir að safna liði og stofnaði Framtíðarsjóð Vignissona til styrktar bræðrunum ungu sem nú ganga í gegnum erfiða tíma. Eva Lind ákvað að að safna áheitum og hlaupa heilt maraþon í svissnesku ölpunum.
Á Facebook-síðu Framtíðarsona birta margir landsþekktir íþróttamenn reynslusögur og senda Evu Lind og hennar aðstoðarteymi baráttukveðjur. Það gerum við líka hér á DV.
