Níu hjónabönd Hin glæsilega Zsa Zsa Gabor gekk níu sinnum í hjónaband, en átta þeirra entust ekki nema í nokkur ár, ef þau entust svo lengi. Hún giftist níunda manninum, sem hún er enn gift, Frederic Prinz von Anhalt, árið 1986 og þar sem hann er af aðalsættum fékk Zsa Zsa titilinn prinsessa. Hún þótti með orðheppnustu konum og gerði oft grín að hinum fjölmörgu skilnuðum sínum. Hún er 99 ára gömul, hefur glatað sjón og heyrn og fyrir einhverjum árum þurfti að taka af henni hægri fótinn til að koma í veg fyrir sýkingu. Auk þess þjáist hún af elliglöpum.

Átta hjónabönd Lana Turner var ein þekktasta leikkona í Hollywood á árum seinni heimsstyrjaldar. Hún giftist átta sinnum, sama manninum tvisvar og skildi jafnoft. Þekktastur eiginmanna hennar var sá fyrsti, hljómsveitarstjórinn Artie Shaw, en hann afrekaði það að kvænast átta sinnum, jafnoft og Turner, en hann sagðist vera óforbetranlegur kvennabósi.

Fann þá réttu í áttundu tilraun Mickey Rooney hóf feril sinn sem barnastjarna og lék allt fram á elliár. Þessi heimsfrægi leikari kvæntist átta sinnum, sömu konunni tvisvar, ein eiginkvenna hans lést eftir átta ára hjónaband þeirra. Fyrsta eiginkona hans var sú frægasta, Ava Gardner. Árið 1978 kvæntist leikarinn áttundu eiginkonu sinni, Joan Chamberlin, og þau eru enn saman.

Sjö tilraunir Leikarinn Richard Pryor kvæntist sjö sinnum og gekk tvisvar í hjónaband með sömu konunni. Pryor lést 65 ára gamall, árið 2005, og hafði þá verið í hjónabandi með eiginkonu númer sjö í fjögur ár.