Hinn hollenski Bart Jansen á sér áhugamál sem seint verður talið hefðbundið. Dagdaglega vinnur hann við að smíða húsþök en í tómstundum dundar hann sér við að taka hræ af dauðum dýrum og breyta þeim í flygildi, eða svokallaða dróna.
Upphafið má rekja til þess að árið 2012 þurfti Jansen að sjá á eftir kettinum sínum Orville sem varð fyrir bíl. Honum nægði ekki að grafa Orville heldur vildi hann gera eitthvað annað – og meira. Kisinn hafði verið skírður í höfuðið á öðrum af Wright bræðum- sem urðu þeir fyrstu í sögunni til að koma mannaðri vélflugu á loft- og þaðan er hugmynd Jensen komin.
Fékk hann verkfræðinginn Arjen Beltman til liðs við sig og líkt á sjá má á meðfylgjandi myndbandi hafa þeir félagar nýtt sér hræ af köttum, strútum, rottum og hákörlum.
Erlendir miðlar hafa undanfarin keppst við að segja frá þessu sköpunarverki tvíeykisins sem vitanlega hafa fengið sinn skerf af gagnrýni. Sjálfir svara þeir ásökunum um grimmd og dýraníð á þann veg að þeir notist eingöngu við hræ af dýrum sem drepist af slysförum eða þeir hafa fengið gefins. Vinna þeir nú að því að breyta kú í þyrlu sem ætluð er til fólksflutninga.
[youtube https://www.youtube.com/watch?v=w8yaaaAZ4r4&w=600&h=360]