Ég byrja föstudaginn á kaffi um níu og fer svo í vinnuna. Ég er markaðs- og viðburðastjóri í Gamla bíói og Petersen svítunni svo það er um að gera að ganga frá öllum veislum og viðburðum helgarinnar áður en helgarfríið byrjar. Eftir vinnu ætla ég að hitta vinkonur mínar í happy-hour í Petersen svítunni svo ég rölti bara upp á næstu hæð frá skrifstofunni, virkilega þægilegt. Um kvöldið ætla ég svo að taka því rólega, kíki kannski út að borða og í bíó. Ég ætla að hlaða batteríin vel fyrir laugardaginn enda virkilega stór dagur framundan fyrir okkur öll. Kosningar, Halloween og kosningavaka – hversu góð blanda er það!? Ég vil samt benda áhugasömum á að Halloween-helgin í Petersen svítunni byrjar klukkan ellefu á föstudagskvöldið.

Á laugardeginum ætla ég að kíkja í dögurð með mínum og fara svo að kjósa. Eftir það hefst undirbúningur fyrir kvöldið en við í Petersen svítunni höldum Halloween hátíðlega alla helgina. Fyrir þau sem ekki vita það þá eiga Gamla bíó og Petersen svítan sér gamla og skemmtilega sögu. Flestir vita að Gamla bíó er gamalt kvikmyndahús, eins og nafnið gefur til kynna, en færri vita að Peter „Bíó“ Petersen, sem lét byggja Gamla bíó og var jafnframt sýningarstjóri, bjó á efstu hæðinni í húsinu ásamt fjölskyldu sinni þar sem nú er Petersen svítan. Þar sem húsið á sér sögu aftur til ársins 1926 hefur orðrómur um reimleika í húsinu verið á kreiki og margir vilja meina að húsið sé krökkt af draugum.
Í tilefni hrekkjavökunnar mun Petersen svítan fá drungalegt útlit og hafa barþjónarnir hannað þrjá stórhættulega hrekkjavökukokteila. Svo verða ókeypis skot í boði fyrir þau sem mæta í búningum frá tíu til miðnættis á laugardeginum. Lofar góðu!

Á sunnudaginn ætla ég að hlaða batteríin fyrir komandi viku, skipuleggja mig vel og gera eitthvað skemmtilegt. Mér er svo boðið í frænkukaffi klukkan þrjú og ég hlakka til að hitta þær. Svo er okkur kærastanum boðið í mat til mömmu um kvöldið þannig að sunnudagurinn endar í faðmi fjölskyldunnar.