Steffý er gestur vikunnar í Fókus, viðtalsþætti DV. Steffý varð móðir fyrir rétt rúmu ári síðan og nýtur mikilla vinsælda á TikTok fyrir að ræða opinskátt um móðurhlutverkið og önnur persónuleg málefni.
„Ég komst að því 2. janúar 2024 að ég væri ólétt,“ segir Steffý, sem þá var 24 ára. „Þannig nýja árið byrjaði með trompi.“
Hún segir að það hafi verið mjög mikið sjokk að fá jákvætt próf. „Við vorum bara búin að vera saman í níu mánuði,“ segir hún og bætir við að þetta hafi ekki beint verið á planinu, allavega ekki strax.
„Það tók alveg nokkra daga að ákveða hvað við vildum gera. Við fórum til fjölskylduráðgjafa og allt, af því við vildum bara gera þetta rétt af því að við vorum einmitt bara búin að vera saman svo stutt. Og við vorum með plön og þetta náttúrulega breytir öllu. Breytir öllu bara í lífinu, en í alvörunni til hins betra. Við erum mjög ánægð með ákvarðanirnar sem við tókum.“
Meðgangan var erfiður tími fyrir Steffý, bæði andlega og líkamlega. Hún ræðir betur um andlega hlutann og áreitið sem hún þurfti að þola í þættinum.
Sjá einnig: Hafði áhyggjur að áreitið myndi hafa áhrif á ófæddan soninn
Hvert áfallið dundi á fætur öðru á þessum níu mánuðum. Fyrst greindist Steffý með frumubreytingar, gengin þá tíu vikur á leið.
„Að vera ólétt og fá þessar fréttir… bréfið er svo formlegt og maður veit ekki hvað þetta þýðir […] Ég hafði líka miklar áhyggjur af því hvað þetta þýddi fyrir fóstrið,“ segir Steffý. Eftir smá óvissu fékk loksins Steffý góðar fréttir og allt fór vel, hún bíður enn eftir að fara í keiluskurð og segist bera fullt traust til læknanna.
Nokkrum vikum seinna dundi annað áfall þegar Steffý fékk E. coli sýkingu. Hún borðaði óvart hráan kjúkling á árshátíð og nokkrum dögum seinna varð hún svo veik að hún var lögð inn á spítala í tvo daga. Aftur óttaðist hún um litla lífið sem óx innra með henni, en sem betur fer jafnaði hún sig og ófæddi sonurinn hlaut engan skaða.
Hún rifjar upp þegar læknir sagði henni óvart kynið á drengnum, en fram að þessu var Steffý viss um að hún ætti von á stelpu. „Tengdamóðir mín er mjög næm, hún sagði að henni liði eins og þetta væri stelpa og ég trúði því. Þannig þegar læknirinn sagði: „Það er í góðu lagi með hann.“ Þá leiðrétti hann og sagði: „Það er í góðu lagi með hana.“ Þá fattaði læknirinn og sagði ekki meira,“ segir Steffý og bætir við að það hafi því verið sjokk, en skemmtilegt, að komast að því að þetta væri svo drengur þegar parið hélt kynjaveislu nokkrum vikum seinna.
Seinna á meðgöngunni greindist Steffý með meðgöngusykursýki og undir lokin með meðgöngueitrun og var í kjölfarið sett af stað gengin 39 vikur.
Meðgangan reyndist Steffý því mjög erfið líkamlega, en andlega var mikið í gangi. Áreiti sem endaði á borði lögreglu. „Mér leið eins og heimurinn væri að segja: Þú átt ekki að vera mamma,“ segir Steffý einlæg. Hún ræðir nánar um meðgönguna, veikindin og áreitið í þættinum sem er hægt að hlusta á Spotify og öllum helstu hlaðvarpsveitum.
