Þeir segja að það hafi verið ömurlegt að lesa fréttir í febrúar síðastliðnum um mann í þeirra stétt sem hafði áreitt viðskiptavin. Þeir ræða málið frekar í spilaranum hér að neðan, brotið er hluti af nýjasta þætti af Fókus, sem má horfa á í heild sinni hér.
Þú getur einnig hlustað á Spotify, Apple Podcasts og hlaðvarpsþjónustu Google.
Í febrúar lýsti kona hræðilegri reynslu í stól húðflúrara á snyrtistofu í Kópavogi. Hún sagðist hafa þurft að sitja í tvöfalt lengri tíma í stólnum hjá manninum sem flúraði mynd, sem hún hafði ekki samþykkt, og hún sagði hann einnig hafa áreitt hana kynferðislega. Konan þurfti að fara og láta breyta og fjarlægja húðflúrið með laser aðgerð, sem er bæði dýrt og sársaukafult.
Í samtali við DV sagði konan að maðurinn hafði læst hana inni, boðið henni kókaín, gripið í rassinn á henni og brjóstin og potað í klofið á henni. Þegar hún hafi grátið hafi hann kallað hana smábarn.
Málið vakti mikinn óhug og segir Ólafur að hann hafi strax farið að kynna sér hver umræddur maður er. Þar sem maðurinn var ekki nafngreindur í fréttum.
„Ég fór beint í að kynna mér hver þetta var og fór að skoða verk eftir hann og þá sá maður svona… það var kannski einhver með tattú á handarbökunum og var svo bara berbrjósta að halda fyrir. Þá hefur hann beðið hana um að afklæða sig fyrir myndina, fyrir eitthvað tattú sem var ekki á búknum. Mjög perralegt,“ segir Ólafur.
„Það eru hálfvitar alls staðar því miður,“ segir Dagur.
„Þetta er glatað að lesa svona, en algjörlega gott hjá henni að segja bara frá þessu og vara fólk við. Það eru ekki allir sem myndu gera það,“ segir Ólafur.
Umræddur maður er enn starfandi en hann er ekki að vinna á neinni tattústofu. Hann var á þeim tíma með aðstöðu á snyrtistofu í Hamraborg í Kópavogi en samkvæmt samfélagsmiðlum hans er hann enn starfandi en ekki er víst hvort hann sé enn á snyrtistofunni eða hafi fært reksturinn annað. Samkvæmt heimildum DV sótti hann um leyfi hjá heilbrigðiseftirlitinu nýlega.
„Þetta var allavega ekki Black Kross, viljum koma því alveg á framfæri,“ segir Dagur.
Dagur og Ólafur halda úti hlaðvarpinu Blekaðir á streymisveitunni Brotkast. Smelltu hér til að hlusta eða horfa.