Aukinn þrýstingur er á stjórnendur evrópskra sjónvarpsstöðva að krefjast brottvísunar Ísraela úr Eurovision söngvakeppninni. Hernaði er hampað í undankeppninni í Ísrael og sumir keppendur flytja lög sín í herklæðum. Einn keppandi dó í innrásinni á Gasa.
Undankeppnin er hafin fyrir Eurovision í Ísrael. Samanlagt verða þetta tíu þættir. Á meðal keppenda var hinn 26 ára gamli Shaul Gringlick, sem mætti í fullum herklæðum á sviðið til að flytja lagið „Atalef Iver.“ Honum var spáð góðu gengi.
Eftir að hafa flutt lagið fór hann hins vegar beint á víglínuna í Gasa og dó þar á annan dag jóla.
Pólski fréttavefurinn Dziennik greinir frá því að keppnin í Ísrael einkennist nú mikið til að upphafningu hernaðar. Það eru ekki aðeins keppendur sem hafa mætt í herklæðum til að syngja lög heldur einnig dómarar.
Hernaðarandi væri yfir keppninni þar og hún væri notuð til þess að efla móralinn heima fyrir í stríðinu á Gasa.
Eins og greint hefur verið frá er mikill þrýstingur á stjórn RÚV að krefjast þess að Ísraelar verði bannaðir í Eurovison, ella dragi Ísland sig úr keppninni. Fordæmi eru fyrir þessu árið 2022 þegar Rússum var vikið úr keppninni eftir hótanir Finna.
Fram til þessa hefur þó virst eins og Íslendingar séu einir í baráttunni. Það er hins vegar að breytast hratt.
Talsmenn gríska ríkissjónvarpsins ERT segjast ekki taka afstöðu til banns að svo stöddu en að þeir séu reiðubúnir til að taka þátt í ýmsum viðræðum. Meðal annars í viðræðum þar sem rætt yrði um að víkja Ísrael úr keppninni.
Þá var greint frá því fyrir skemmstu í írskum miðlum að þrýstingur væri að aukast á ríkissjónvarpið þar í landi, RTE. Hátt í 500 tölvupóstar hefðu borist þar sem fólk krafðist þess að Írland hætti þátttöku vegna viðveru Ísrael í keppninni. Í yfirlýsingu sögðu RTE að þeir ætluðu ekki að bregðast við að svo stöddu þar sem engin önnur sjónvarpsstöð hefði krafist brottvikningar Ísraels. Umræðan um þátttöku Írlands hefur einnig borist út í stjórnmálin þar í landi.
Finnska ríkissjónvarpið YLE hefur einnig fengið fjölda áskorana um að hætta þátttöku. Að sögn talsmanna þess hefur engin ákvörðun verið tekin. Þann 10. janúar á að tilkynna finnsku þátttakendurna í undankeppninni.
Sumir þátttakendurnir hafa einnig látið hug sinn í ljós gagnvart Ísrael eftir árás þeirra á Gasa. Meðal annars breski þátttakandinn Olly Alexander. Hann skrifaði undir bréf þar sem Ísrael var sakað um að stunda aðskilnaðarstefnu gagnvart Palestínumönnum, rétt eins og var stunduð í Suður Afríku á sínum tíma.
Margir muna eftir króatísku rokkhljómsveitinni Let3 úr Eurovision á þessu ári, þar sem skotið var á Vladímír Pútín Rússlandsforseta undir rós í ljósi þess að pólitískur áróður er bannaður í keppninni. Þeir eru mættir aftur í króatísku undankeppnina með lag þar sem í textanum má finna harða gagnrýni á Ísrael. Þeir segjast líka ekki ætla að stíga á sviðið í Malmö ef Ísraelsmönnum verður leyft að keppa.
