„Ég finn ekki mikla reiði. Ég hins vegar finn að ég er rosalega sár að enginn sé að axla ábyrgð,“ segir Heiðrún Finnsdóttir. Hún missti föður sinn og stjúpmóður í bifhjólaslysi á Kjalarnesi þann 28. júní 2020.
Finnur Einarsson, 54 ára, og Jóhanna Sigríður Sigurðardóttir, 53 ára, voru á mótorhjóli sem lenti á húsbíl á vegarkafla á Vesturlandsvegi á milli Grundarhverfis og Hvalfjarðarganga í lok júní 2020. Vegarkaflinn var nýlagður og flugháll, það kom í ljós að efnið í veginum hafi verið vitlaust blandað. Gallaða klæðningin var enn svo hál að sjúkrabíll sem kom á vettvang rann út af veginum.
Sjá einnig: Banaslysið á Kjalarnesi – Ótækt að Vegagerðin rannsaki sjálfa sig
Heiðrún er gestur vikunnar í Fókus, spjallþætti DV. Hún ræðir um föðurmissin, tildrög slyssins og eftirmála þess.
Hún lýsir pabba sínum og segir að hann hafi verið hennar helsti stuðningsmaður.
„Pabbi var manna fyrstur til að hvetja mann áfram. Hann var stórkostlegur karl, með stóran persónuleika, mikinn hlátur og svartan húmor,“ segir hún.
„Síðast þegar ég vissi voru þrír með réttarstöðu sakbornings og málið var sent til saksóknara sem sagði að það hafi ekki verið rannsakað nógu vel svo það var sent aftur til lögreglunnar í rannsókn,“ segir hún og bætir við að hún viti ekki alveg nákvæmlega hvar málið stendur núna.
„Það er rosalega erfitt að fara þangað, maður tekur tarnir þar sem maður er að ýta á eftir þessu og hugsa um þetta. En svo er líka rosa gott að stíga frá því og geta aðeins andað og unnið úr sorginni.“
„Ég finn ekki mikla reiði. Ég hins vegar finn að ég er rosalega sár að enginn sé að axla ábyrgð. Þarna er slys, það er mjög bersýnilegt hverjum það er að kenna. Það eru tveir verktakar, stórir verktakar. […] Þetta fólk er ennþá starfandi, ennþá stórir risar, búnir að valda tveimur manndrápum og ef þetta væru einstaklingar þá væru þeir í fangelsi, eða eitthvað svona, þeir væru ekki ennþá að leggja malbik,“ segir Heiðrún og bætir við að henni þyki mjög skrýtið að Vegagerðin hafi verið látin rannsaka sjálfa sig.
Hún ræðir þetta nánar í spilaranum hér að ofan. Horfðu á þáttinn í heild sinni hér, eða hlustaðu á hann á Spotify.
Fylgstu með Heiðrúnu á Instagram.
