Patrik Snær Atlason, kallaður Prettyboitjokko, segir að hann hljóti að vera að gera eitthvað rétt fyrst honum tókst að styggja menn eins og Egil Helgason og Bubba Morthens.

Patrik var gestur morgunþáttarins Bítið á Bylgjunni í dag og talið barst að tónlistarmanninum Bubba Morthens.

„Ég nenni ekki að tala um Bubba, hann var eitthvað að drulla yfir mig um daginn,“ sagði Patrik.

„Hann sagði að ég væri ekkert nema innihald, nei, útlitið og ekkert innihald. Hann og Bó Hall eru ekki ánægðir með mig, en þá veit maður að maður er að gera eitthvað rétt. Björgvin þarf að passa sig.“

„Hvaðan kemur þessi asnalega efnishyggja?“

Það má rekja forsögu málsins til færslu sem fjölmiðlamaðurinn Egill Helgason skrifaði í lok júlí.

„Gústi B kaupir sér Rolex, Prettyboitjokko kaupir dýra sundbrók og sportbíl, Gummi kíró gengur í Gucci. Um svonalagað les maður daglega í fjölmiðlum. Hvaðan kemur þessi asnalega efnishyggja? Ég man þá tíð að svona hefði þótt alveg innilega ófínt. En nú er því stillt upp eins og þarna sé gríðarlega eftirsóknarverður veruleiki.“

Hugleiðingar Egils vöktu mikla athygli og tóku nokkrir þjóðþekktir einstaklingar undir með Agli. Meðal þeirra var Bubbi sem skrifaði: Umbúðir ekkert innhald.“

Tónlistarmaðurinn Björgvin Halldórsson var sammála og sagði:  „Endalaus sjálfshátíð“.

„Menn eru svo blindir á sjálfa sig“

Umræðan fór ekki framhjá Patrik sem virðist ekki taka þetta nærri sér.

„Þegar maður er að styggja þessa gæja þá verður maður að gefa sér klapp á bakið,“ sagði hann.

„Menn eru oft svo blindir á sjálfa sig, ég sé ekki annað en myndir af Bubba í dýrustu laxám landsins en menn vilja ekki tala um það. En það er önnur saga.“

Þú getur hlustað á viðtalið við Patrik hér.