Þjálfarinn og áhrifavaldurinn Sandra Björg Helgadóttir gekk upp að altarinu í gullfallegum brúðarkjól og giftist sínum heittelskaða, Hilmari Arnarssyni, þann 22. júlí 2022.
Hjónin eru búsett í Los Angeles, brúðkaupið var á Íslandi en öll undirbúningsvinnan fór fram erlendis, þar á meðal leitin að hinum fullkomna brúðarkjól.
Sandra fer yfir brúðarkjólaferlið á bloggsíðu sinni, sandrahelga.com, en hún lærði mikið á þessu ferli sem hún hefur miðlað áfram til vinkvenna sinna. Eins og að byrja fyrr að leita að kjól en hún gerði.
„Þetta ferli er svo ótrúlega skemmtilegt,“ segir hún en viðurkennir að það hafi líka verið stressandi á köflum en allt gekk að lokum.
View this post on Instagram
Sandra rifjar upp fyrstu heimsóknina í brúðarkjólaverslun sem sló hana aðeins út af laginu.
„Í lok mars 2022 ætlaði ég að fara að undirbúa mátanir í LA og fyrsta búðin sem ég gekk inn í heitir Kinsley James og er staðsett á 3rd Street í West Hollywood. Yndisleg kona tók á móti mér og spurði um dagsetningu brúðkaupsins. Ég sagði henni að það yrði 22. júlí en ég myndi fljúga til Íslands í lok júní. Hún svaraði með ekta amerískum tilþrifum: „OOOOH so you‘re an EMERGENCY BRIDE!! You have VERY limited options but let me see what I can do.““
Sandra átti ekki von á þessu. „Ég hélt ég gæti valið hvaða kjól sem er í búðinni og þær myndu eiga hann til í nánast öllum stærðum. Kannski er það bara ég sem er svona vitlaus, vita þetta bara flestir?“ spyr hún og fer síðan yfir hvernig ferlið virkar í brúðarkjólaheiminum.
Þarna áttaði Sandra sig á að hún ætti erfitt verk fyrir höndum sér og ráðleggur tilvonandi brúðum að byrja að leita að kjól allavega hálfu ári fyrir brúðkaupsdaginn.
„Út af þessari reynslu hjá mér, þá hef ég verið að nefna við vinkonur mínar að það sé nánast aldrei of snemmt að byrja að kíkja í mátun, meira segja þó þú sért varla komin með hring. Þú gætir mögulega sett óþarfa pressu á makann ef hann heyrir af mátuninni,“ segir hún.
Sandra keypti tíu kjóla þar til hún fann þann rétta, þannig kjólarnir voru samtals ellefu. Hún fer yfir allt ferlið í blogginu þar sem hún birtir einnig myndir af nokkrum kjólum og gefur góð ráð. Eins og að prófa að setjast í kjólnum þegar þú mátar hann og vera í hvítum eða húðlitum nærfötum þegar þú mátar.
„Jafnvel þeim nærfötum sem þú ætlar að vera í brúðkaupinu. Ef þú ætlar að vera í aðhaldsfatnaði eða sokkabuxum þá er gott að máta í því,“ segir hún.
Hún leggur líka áherslu á mikilvægi þess að vera í brúðarskónum þegar þú ferð í „fitting“ og segir það vera lykilatriði þegar kemur að stytta kjólinn.
Draumakjólinn fann Sandra í verslun fræga brúðarkjólamerkisins Galia Lahav.
„Ég bókaði mér tíma í mátun en fannst ég nánast vera að sóa tíma afgreiðslukonunnar með því að láta hana stjana við mig. Ég hafði sem áður, takmarkað úrval og var leidd inn í rými þar sem „off the rack“ kjólarnir voru. Ég sá strax kjól sem mér fannst fullkominn. Það var akkúrat kjóll sem hún hafði tekið til hliðar fyrir mig eftir að ég ég hafði lýst fyrir henni sniðinu og útlitinu sem ég vildi.“
„Ég ætlaði ekki að trúa þessu, hann var eins og sérsniðinn á mig. Enda segir svipurinn á myndinni allt sem segja þarf. Ég fór strax að reyna að finna eitthvað sem ég myndi ekki fýla við kjólinn, því ég ætlaði nú ekki að fara að kaupa ellefta kjólinn,“ segir hún.
En þegar afgreiðslukonan kom með slörið við kjólinn vissi Sandra að þetta væri rétti kjóllinn.
„Þarna var ég nánast eins og þegar ég féll fyrir Hilmari, yfir mig ástfangin, en þorði ekki að leyfa mér að njóta aungabliksins því ég var ekki viss um að þetta væri að fara að rætast,“ segir hún.
Sandra hvetur konur til að njóta vegferðarinnar í leitinni að hinum fullkomna brúðarkjól.
„Ástæðan fyrir því að mig langaði að deila þessu bloggi með ykkur er sú að maður sér oft fyrir sér að allir aðrir eigi fullkomið brúðarkjólaferli, sem eflaust margir eiga. Það eru þó margir sem fara í gegnum allskonar stress, allan tilfinningaskalann og leiðin að þínum kjól eða kjólum er einstök,“ segir hún.
„Njóttu vegferðarinnar, gangi þér vel og mundu að það er allt eins og það á að vera eins og mágkona mín, Hrafnhildur, kenndi mér.“
View this post on Instagram
Sandra fór yfir ævintýrið í myndbandi á YouTube og skrifaði einnig færslu um undirbúninginn fyrir brúðkaupið sem má lesa á sandrahelga.com.
Hún heldur einnig úti vinsælli Instagram-síðu þar sem hún sýnir frá lífi sínu í Los Angeles og hefur birt fjölda fallegra mynda frá brúðkaupsdeginum.
