Tónlistarkonan Hafdís Huld er allt í öllu á íslenska listanum á Spotify. Það er þó ekki glæný lög eða plata sem eru að slá í gegn heldur barnaplatan Vögguvísur sem kom út árið 2012 og er því að fagna tíu ára afmæli sínu,

Hafdís Huld vann plötuna ásamt tónlistarmmanninum Alisdair Wright og síðan hefur hún verið í miklu uppáhaldi hjá örþreyttum og buguðum foreldrum sem spila hana í tíma og ótíma fyrir börn sín. Velgengni plötunnar hefur verið lygileg, enda sannarlega frábært verk í alla staði, en í nóvember 2021 fengu aðstandendur Vögguvísna tvöfalda platínuplötu fyrir verkið. Þá var platan árið 2020 mest selda plata ársins, átta árum eftir að hún kom fyrst út.

Í frétt um hina tvöföldu platínumplötu á DV á sínum tíma var bent á það að lagið „Dvel ég í draumahöll“  væri í sautjánda sæti yfir vinsælustu lög landsins þegar fréttin væri skrifuð.

En svo virðist vera sem íslenskir foreldrar hafi aldrei þurft meira á Hafdísi Huld að halda en nú í sumar. Þegar þessi orð eru skrifuð situr öll platan, fimmtán lög alls, í efstu 25 sætunum og þar af á „Dvel ég í draumahöll“ toppsætið. Greinilegt er að hlustendur spila plötuna í gegn aftur og aftur og mögulega jafnvel aftur.

Gullpenninn Hrafn Jónsson vakti athygli á þessu á Twitter í gær en í færslunni hvatti hann nýja og verðandi foreldra til að setja á svokallaða private session á Spotify þegar Hafdís Huld og önnur vinsæl barnalög væru í spilun. Þannig myndi spilunin ekki hafa áhrif á til að mynda vinsældarlista eins og Top 50 Iceland og meira yrði að marka algóritmann alvitra.

Ef hef bara eitt ráð sem ég get gefið nýjum og verðandi foreldrum: setjið á fkn Private session á Spotify þegar þið spilið Skoppu og Skrítlu og Hafdísi Huld og fokking Sollu Stirðu. Annars verður allur algoriðminn og öll recomendations fucked um alla og ókomna tíð.

— Hrafn Jónsson (@hrafnjonsson) August 25, 2022

Tóku margir undir með tillögu Hrafns. Óskar Hauksson, meðlimur Quarashi, benti á að það hefði tekið hann tvö ár að losna við uppástungur um barnalög Hafdísar Huldar á sínum Spotify-reikningi. Annar netverji tók sömuleiðis undir þessi og sagði að nú væri kominn tími til að standa vörð um íslenska listann á Spotify, hann væri einfaldlega týndur.