Maðurinn sem notast við Instagram-nafnið „kingsanchezx“ hefur verið að loka aðgöngum frægra Íslendinga seinustu daga og hefur fjöldi áhrifavalda orðið fyrir barðinu á honum.
Flestir þeirra sem eiga aðgangana sem hefur verið lokað berjast fyrir því að fá aðgangana aftur. Það hefur þó gengið brösuglega og Instagram og Facebook (eigandi Instagram) svara litlu.
DV hafði samband við hakkarann og ræddi við hann.
„Ég geri þetta ekki að neinni sérstakri ástæðu, þetta eru bara viðskipti. Ég vel þessa aðganga ekki, einhverjir finna mig og borga mér fyrir að loka þessum aðgöngum og ég geri það,“ segir hakkarinn en hann segist vera frá Tyrklandi.
Hann sendir skilaboð til þeirra sem „búa í litlum íbúðum“ og eru að berjast með áhrifavöldunum.
„Ekki gleyma að þessum áhrifavöldum er alveg sama um ykkur. Þeir munu ekki fá aðgangana til baka ókeypis,“ segir hakkarinn en að hans sögn hefur hann verið að gera þetta í nokkur ár.
Upp hafa komið kenningar um að þetta sé markaðstrikk hjá markaðsfyrirtækjum til að auglýsa eitthvað. Þessi hugmynd var til að mynda rædd í hlaðvarpinu Alex og Davíð.
@alexogdavidEr Nökkvi Fjaler the ultimate cloutfarming mastermind á bakvið þetta?
Árið 2019 var öllum færslum á Instagram-síðu Áttunnar eytt og tilkynnt að hakkarar hefðu tekið yfir síðuna. Þá var einnig öllum myndböndum eytt af YouTube-síðu þeirra. Það reyndist að lokum vera markaðstrikk.