Athafnakonan Birna Bragadóttir lauk á dögunum göngu þvert yfir Vatnajökul á gönguskíðum. Þetta gerði hún ásamt hópi góðra kvenna í hópnum Snædrífur til styrktar Lífskrafts, átaks í útivist og hreyfingu sem safnar áheitum fyrir Kraft, félag ungs fólks sem greinst hefur með krabbamein, og Líf, styrktarfélag kvennadeildar Landspítalans.
Birna hefur deilt upplifun sinni frá ferðalaginu, til að mynda á Facebook-síðu sinni. Hún segir að verkefnið hafi verið mikla líkamlega og andlega áskorun.
„Að þvera Vatnajökul á gönguskíðum var fyrir mér bæði líkamleg og andleg áskorun, sem krefst mikils undirbúnings, þrautseigju, æðruleysi, ákvörðun um að gefast ekki upp, félagslegs úthalds og liðsheildar. Þetta og svo margt fleira þarf að vera til staðar til þess að leiðangur sem þessi gangi vel. Þá́ er svo gott að geta tileinkað sér það að taka einn dag í einu, því hver dagur hefur nýtt upphaf, jafnvel þótt að leifar gærdagsins minni á sig í gegnblautum skóm, hælsæri eða svefnliítilli nótt.“
Um er að ræða 150 kílómetra skíðagöngu þvert yfir Vatnajökul. Birna sagðist koma til baka sem ný manneskja. Þá deildi hún nokkrum ljósmyndum af andliti sínu sem sýndu hversu mikil áhrif ferðin hefði á hana enda krefjandi að ganga í snjó með tilheyrandi endurkast og veðrun dag eftir dag.
„Þeir örfáu sem að ég þekki og hafa þverað Vatnajökul segja að maður komi heim sem breytt manneskja. Það er svo sannarlega rétt en ég átti ekki alveg von á þessu!“
Enn er hægt að heita á Lífskraft með því að senda sms í símanúmerið 1900: LIF1000, LIF3000, LIF5000 og LIF10000, til að styrkja um 1000-10.000 þúsund krónur. Einnig er hægt að leggja inn á reikning 1161-26-9900, kt. 501219-0290, eða með AUR appinu í sima 789 4010.
Birna hvetur fólk til að leggja sitt af mörkum.