Gísli Marteinn Baldursson, fjölmiðlamaður og áhugamaður um borgarlíf, virðist ekki parsáttur með mannlífið í Garðabæ, en þangað fór hann til dýralæknis í dag. Gísli hefur gjarnan verið séður sem einskonar talsmaður vesturbæjar Reykjavíkur og stundum rætt og grínast með að þar sé borgarlífið best.

Á Twitter-síðu sinni ræðir hann um að hafa ekki átt möguleika á því að kaupa sér kaffi og morgunmat í bænum og hann hafi endað á því að taka strætó aftur til Reykjavíkur.

Er í Garðabænum og þarf að bíða í 2-3 tíma á meðan Tinni er hjá lækni. Hélt að grín mitt ofl um lítið mannlíf og engin kaffihús væru ýkjur og hér hlytu að leynast einhverjir staðir þar sem ég gæti fengið mér kaffi og morgunmat. Í stuttu máli er ég að bíða eftir ásnum til Rvk.

— Gísli Marteinn (@gislimarteinn) May 27, 2020

Tíst Gísla vakti töluverða athygli og fékk hann þónokkrar ábendingar og uppástungur um staði sem hann gæti farið á, til að mynda á Jóa Fel, Mathús Garðabæjar, Ikea , Brauð & Co og á Hönnunarsafnið. Gísli gaf mismunandi ástæður fyrir því að hafa ekki farið á þá staði, sumir voru lokaðir og aðrir of langt í burtu frá honum.

Þá stakk fólk einnig upp á því að Gísli myndi fara í Hafnarfjörðin, til dæmis á kaffihúsið Pallett. Því svaraði hann með því að segja að þar væru líklega margir góðir kostir, þó að honum þætti að lélegar ákvarðanir hefðu verið teknar í borgarskipulagi þess bæjar.

Ég er mjög hrifinn af Hafnarfirði þótt hann hafi lagt sig allan fram við að klúðra sínum málum með vondum skipulagsmistökum. Og ef ég hefði verið hjá dýralækni þar, þá hefði ég sannarlega haft fullt af góðum kostum!

— Gísli Marteinn (@gislimarteinn) May 27, 2020

Elska Pallet. En ég er meira en nokkrar mínútur að labba þangað held ég. Það var líka rok og rigning. Tók bara strætó heim.

— Gísli Marteinn (@gislimarteinn) May 27, 2020

Gísli sagðist þó treysta því að mannlíf Garðabæjar myndi lifna við seinna um daginn, en var ekki nægilega sáttur með það sem var í boði svona snemma.

Treysti því að þetta lifni við seinnipartinn. Þetta var stemningin kl. 10:51:https://t.co/NKd7gyO8Bo

— Gísli Marteinn (@gislimarteinn) May 27, 2020