Ólafur Friðrik Magnússon, fyrrverandi borgarstjóri, læknir, tónlistarmaður og ljóðskáld er æfur úr í RÚV vegna forkeppni Söngvakeppni evrópskra sjónvarpsstöðva. Framlag Ólafs, lagið „Ég finn til sælu“ hlaut ekki náð fyrir augum dómnefndar og komst ekki inn í undankeppnina. Ólafur rak augun í upplýsingar sem koma fram í viðtali við söngkonuna Hildi Völu Einarsdóttur í Fréttablaðinu í dag, þess efnis að hún og eiginmaður hennar, Jón Ólafsson, hafi verið beðin um að senda lag í keppnina.

Þetta verður Ólafi tilefni til eftirfarandi hugleiðinga sem hann benti DV á:

ÖMURLEGT – Vei þér Rúv.

Rétttrúnaðurinn velur sitt fólk í „keppni“ fyrir sitt fólk á kostnað almennings.
Jón Ólafsson er ekki síðri í rétttrúnaðinum en tónlistinni.
Væri ekki bara nær að Rúv veldi sína frambjóðendur í „keppnina“ og hefði ekki annað fólk að fíflum

Í stuttu samtali við DV telur Ólafur að hér skipti máli að lagahöfundurinn Jón Ólafsson sé vinstri maður en hann sjálfur hægri sinnaður. Ólafur telur að lag hans hafi átt fullt erindi í keppnina en umfram allt er hann ósáttur við að fólk sé beðið um að senda lag inn í keppni þar sem velja á milli framlaga og dæma þau af dómnefnd.

Lag Ólafs sem hann sendi inn í keppnina má hlýða á í spilaranum hér að neðan: