Áfengið lék hinn fræga útvarpsmann, tónlistarmann og skemmtikraft Þorgeir Ástvaldsson grátt á árum áður. Þorgeir, sem fagnaði sjötugsafmæli fyrir skömmu, er í viðtali í þætti Sigumundar Ernis Rúnarssonar, Mannamáli, á Hringbraut í kvöld, en þar greinir hann meðal annars frá því er hann gleymdi að sækja barnungan son sinn úr pössun.
Þá segir frá því er Þorgeir mætti til vinnu sinnar á útvarpsstöðinni Stjörnunni snemma morguns eftir mikinn gleðskap, þar sem hann ætlaði að taka viðtal við Svavar Gestsson, þáverandi ráðherra. Ráðherrann sat á biðstofunni og fletti dagblaði en útvarpsmaðurinn gleymdi þessum viðmælanda sínum og lauk við þáttinn án þess að ræða við hann!
Drykkjan varð Þorgeiri fjötur um fót og sagði hann skilið við áfengið.
Í spjallinu við Sigmund Erni segir Þorgeir ennfremur frá samstarfinu í hinni víðfrægu Sumargleði, hljómsveitarstússinu með Tempó, vinskapnum við Ragga Bjarna og byltingarkenndum breytingum í fjölmiðlum, og þá einna helst í útvarpi þar sem Þorgeir var frumkvöðull, ekki síst með stofnun Rásar tvö árið 1983.
Þátturinn Mannamál er á dagskrá Hringbrautar kl. 20 í kvöld.
