Guðmundur Kristján Jónsson, fyrrverandi aðstoðarmaður Þorgerðar Katrínar Gunnarsdóttur, vekur athygli á sölu fasteignar á vef Morgunblaðsins en óhætt er að segja að einbýlishúsið sé allt hið glæsilegasta. Húsið er í eigu Jóhanns J. Ólafssonar, sem er sjaldan kallaður annað en stórkaupmaður.
Guðmundur deilir líkt og fyrr segir mynd af húsinu og skrifar: „Margt sem þarf að ræða hér“. Því svarar Gunnar Dofri Ólafsson, fyrrverandi starfsmaður Viðskiptaráðs Íslands: „Þarna búa eingöngu góðmenni. Mér er málið að vísu dálítið skylt. Veit ekki hversu oft ég hef komið þarna en í hvert skipti finnast mér Versalir blikna í samanburð.“ Fleiri skrifa athugasemdir svo sem Pétur Vilhjálmsson en hann segir: „Eldhústækin eru svo out of character að ég neita að trúa að allar myndirnar séu úr sömu íbúð.“
Húsið er til sölu á litlar 149 milljónir og er um 400 fermetrar að stærð. Myndir af því má sjá hér fyrir neðan. Eigandinn er fyrrnefndur Jóhann en hann var meðal annars um tíma formaður Viðskiptaráðs. Hann komst til efna þegar hann tók við við fyrirtækinu Jóhann Ólafsson & Co. af föður sínum. Hann hefur nýverið skrifað greinar þar sem hann boðar harða frjálshyggju og andstöðu við skattlagningu ríkisins. Það var gagnrýnt í pistli á Miðjunni í vikunni.