Lagið Aðeins nær þér, í flutningi lagahöfunda- og framleiðsluteymisins September og Birgittu Haukdal, kom nýverið út. Það væri svo sem ekki í frásögur færandi nema fyrir þær sakir að mennirnir tveir sem skipa September, Eyþór Úlfar Þórisson og Andri Þór Jónsson, létu með laginu gamlan draum rætast.

„Um daginn vorum við Eyþór í stúdíóinu að pæla í hvaða listamönnum við værum til í að gera lag með, upp kom sú hugmynd hjá okkur hvað það væri mikil gargandi snilld að gera lag með Birgittu Haukdal þar sem hún er ákveðin táknmynd í íslensku poppi og við vorum báðir vægast sagt súper fans þegar við vorum litlir,“ segja félagarnir en Birgitta sagði samstundis já og lagið varð klárt á mettíma. „Frá demói yfir í lokaútgáfu lagsins liðu einungis tvær vikur.“