fbpx
Sunnudagur 26.maí 2019

DV - Frjáls og óháður miðill

Fókus

Magnús var dálítið þreyttur á því að svara alltaf sömu spurningunum í IKEA: Hér koma nýju svörin við þeim

Ágúst Borgþór Sverrisson
Miðvikudaginn 24. apríl 2019 21:57

Ekki missa af Helstu tíðindum dagsins í pósthólfið þitt

Lesa nánar

Magnús Thorlacius er kornungt ljóðskáld og upprennandi sviðslistamaður sem nýlega gaf út ljóðabók sem innblásin er af reynslu hans af því að starfa í IKEA. Þar var Magnús starfsmaður um tæplega tveggja ára skeið og þegar hyllti undir starfslokin fékk hann þá hugmynd að skrifa ljóðabók um þetta efni.

Magnús telur IKEA var stóran hluta af íslenskri þjóðarsál. „Ég hef hvorki jákvæða né neikvæða mynd af IKEA í dag – IKEA er bara IKEA,“ segir Magnús.

Honum líkaði ekki illa að vinna í IKEA en stundum varð starfið leiðigjarnt: „Ég var alltaf að leysa sömu vandamálin alla daga og ég var alltaf að svara sömu spurningunum. Ég fékk þess vegna þá hugmynd að svara þessum spurningum með abstrakt hætti í þessum ljóðum. Í svörunum sem bókin geymir er hamingjunnar leitað í tilgangsleysi hversdagsleikans.“

Hér eru sýnishorn úr bókinni:

Hvað er vinsælast?

Það er annaðhvort í tísku

að líða ógeðslega illa

eða ógeðslega vel

Þess vegna mun ég ávallt vera tískuslys

 

Fylgja samsetningaleiðbeiningar?

Til að negla minningar

að tíma meðvitundarinnar

                fylgir

Til að skrúfa tilgang

að draumi eilífðarinnar

ekki

Til að bora leið

að æsku hamingjunnar

bæklingur

 

Hvernig kemst ég út?

Stysta leiðin

er merkt með gulum og bláum örvum

á göngum fyrirfram ákveðinnar lífsleiðar

 

Titillinn „Heimilislausar íbúðir“ er óvenjulegur og mótsagnakenndur. Magnús hefur þar í huga öll uppstilltu „heimilin“ sem blasa við viðskiptavinum í IKEA. „Þetta eru öll þessi mögulegu framtíðarhíbýli sem maður á möguleika á að eignast en enginn býr í þessum íbúðum. Þetta eru sýniseintök af hamingjunni sem fólk vill öðlast,“ segir Magnús.

Kápa bókarinnar er að sjálfsögðu í IKEA-litunum.

Leikhúsið og ritlistin heilla jafnmikið

Magnús, sem er aðeins 21 árs, lauk stúdentsprófi frá MH vorið 2018 og hefur nú fengið inni á Sviðshöfundabraut Listaháskóla Íslands. „Námið snýst um allt sem snýr að leikhúsi, að skrifa leikrit, setja upp sýningar, leikstýra,“ segir Magnús en ritlistin og leikhúsið heilla hann jafnmikið. „Svo getur maður nýtt það sem maður skrifar í leiksýningar,“ segir hann.

Útgáfuteiti vegna bókarinnar „Heimilislausar íbúðir“ verður í Tjarnarbíói fimmtudagskvöldið 2. maí kl. 20. Þar verður bókin að sjálfsögðu til sölu en hún kostar 2.000 kr. Hægt er nálgast eintök einnig með skilaboðum á netfangið verdlaus@gmail.com eða á facebook.com/verdlaus

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Fókus
Fyrir 2 dögum

Sextán ára að gefa út tónlist: „Fólk veit ekkert hvernig ég er í alvörunni“

Sextán ára að gefa út tónlist: „Fólk veit ekkert hvernig ég er í alvörunni“
Fókus
Fyrir 2 dögum

DV leikur sér að heitasta filternum á Snapchat – Sjáið myndirnar

DV leikur sér að heitasta filternum á Snapchat – Sjáið myndirnar