Ljóðabókin Þvottadagur er fimmta skáldverk Jónasar á innan við þremur árum. Þetta stórtæka skáld er ein af frambærilegustu röddum samtímans og ber Þvottadagur skýr merki fágun og skemmtilegan stíl höfundar. Fyrir ljóðabókina Stór olíuskip hlaut Jónas Bókmenntaverðlaun Tómasar Guðmundssonar. Hann hefur einnig gefið út ljóðabókina Leiðarvísir um þorp og skáldsögurnar Millilendingu og Krossfiska.
Þvottadagur er svona eins og Á tali með Hemmi Gunn, hún er með eitthvað fyrir alla. Ást, ástarsorg, trega, gleði, ljóðrænu, léttleika og húmor, alvörugefni og spennu. Hér birtist höfuðborgin úr hugarfylgsnum ungs reykvísks skálds sem fléttar saman augnablikið þegar parið hættir saman, ruslabílarnir skafa rusl næturinnar af götum borgarinnar og þegar ljóðmælandi þarf að setja í vél.
Ljóðin innihalda frábærlega meitlaðar myndlíkingar sem bera endurtekið fyrir augu, tengja þannig ljóð bókarinnar saman og mynda heildstætt ljóðasafn. Þó má einnig taka niður í bókina hvar sem er og lesa á hverri blaðsíðu eitt heilsteypt ljóð.
Óvæntar tengingar og myndlíkingar eins og:
„það er verið að sýna þögla kvikmynd
í glugganum á kaffihúsinu
borgarlíf í móðu er titillinn…“
er hvarvetna að finna í Þvottadegi.
Þvottadagur er í senn eitt augnablik, einn dagur og eitt ár. Það hefst á þvottavélinni og endar á gamlárskvöldi þegar talið er niður frá tíu þar sem „…tveir hlýir líkamar undir svörtu teppi“ skilja lesandann eftir í lausu lofti, sem er notalegt og uggandi á sama tíma.
Höfundur: Jónas Reynir Gunnarsson
Útgefandi: Páskaeyjan
54 blaðsíður.
