Anna Claessen, framkvæmdastjóri Dans og Kúltúr, gagnrýndi fyrirsætuna Bryndísi Líf harðlega í gær.

Bryndís Líf nýtur mikilla vinsælda á Instagram og hefur vakið athygli fyrir að birta djarfar myndir. Vinsældir hennar hafa farið hratt vaxandi. Í dag er hún með rúmlega 25 þúsund fylgjendur á miðlinum. Þegar DV tók viðtal við hana í ágúst var hún með 17 þúsund fylgjendur.

Eins og fyrr segir hefur Bryndís Líf vakið mikla athygli fyrir að birta djarfar myndir af sér og fer það ekki vel í alla. Anna gagnrýndi hana harðlega í gær og líkti meðal annars Bryndísi við klámstjörnu.

„Flott hjá henni að hafa hugrekki að sýna sig eins og hún er. En aftur á móti lítur það líka út alveg eins og Instagram klámmyndastjarnanna.  Fara þá ekki allir að sýna líkamann sinn og Instagram verður líkara Pornhub?,“ sagði Anna.

Anna spurði hvers konar áhrifavaldur Bryndís Líf væri. „Hún má auðvitað gera það sem hún vill á sínum instagram reikning. En hann er opinn. Aðrir fylgja henni. Fréttamiðlar deila efni hennar og hún verður áhrifavaldur. Hvernig myndi henni líða ef litla systir eða frænka myndi deila svona efni af líkama þeirra? Verra, hvernig er talað við hana á Tinder eða á djamminu? Missir hún virðingu? Eða fær hún fleiri tækifæri“

Bryndís Líf hefur lítið tjáð sig um gagnrýnina en birti mynd af grein DV um gagnrýnina í Instagram Story og skrifaði: „Ísland getur ekki höndlað mig“ með hlátur-tjákni. Hún deildi síðan nýrri mynd og bað fylgjendur um að lesa textann með myndinni.

https://www.instagram.com/p/B3XpoD6A1s1/

„Ekki hafa áhyggjur af því sem ég er að gera. Hafðu áhyggjur af hverju þú hefur áhyggjur af því sem ég er að gera,“ skrifaði Bryndís Líf með myndinni og er líklegast að vísa í gagnrýni Önnu.

„Það er eins og [nekt] sé tabú hérna á Íslandi að mínu mati. Eins og þetta sé eitthvað nýtt. En ég fylgi alveg áhrifavöldum að utan og þá er þetta bara fullkomlega eðlilegt, kannski af því að þar er heitara, ég veit ekki. En mér finnst þetta svona „free-spirited“ dæmi, að láta ekki einhvern annan hefta mig því þeim finnst þetta ekki í lagi,“ sagði Bryndís Líf í viðtali við DV í ágúst.