Í dag færðu aðstandendur Evu Örnólfsdóttur Ljósinu að gjöf tvær over-lock saumavélar, kvengínu, straujárn og ermastraubretti auk fleiri verkfæra til nota í saumahorni Ljóssins, í minningu Evu, sem lést á jóladag, 25. desember síðastliðinn, þá nýorðin sjötug.
Eva sótti mikla fræðslu, afþreyingu og hreyfingu til Ljóssins, en þótti hvað skemmtilegast að mæta á saumanámskeiðin enda mikil hannyrðakona allt sitt líf. „Það er von þeirra að með gjöfinni geti enn fleiri ljósberar notið hannyrðastarfsins til að stytta stundi, rækta hugann og bæta líðan,“ segir á Facebook-síðu Ljóssins.
Að auki færði maður hennar, Ragnar Jónasson, 100.000 krónur til annarar starfsemi Ljóssins en gjöfin er að hluta til peningar sem Eva fékk í tilefni 70 ára afmælis síns.
„Við í Ljósinu sendum auðmjúk okkar allra björtustu þakkarkveðjur til allra ættingja og vina Evu. Það er óhætt að segja að svona framlag skipti sköpum en hver ein og einasta króna sem okkur gefst rennur í endurhæfingarstarfið og umgjörð þess.“
