Hin skemmtilega Fíasól snýr aftur í nýjustu bók Kristínar Helgu Gunnarsdóttur, sem er margverðlaunaður fjölskyldubókahöfundur, henni til halds og traust er Halldór Baldursson sem er sérfræðingur í að teikna Fíusól, vini hennar og vandamenn.

Bækurnar um Fíusól hafa þrívegis hlotið Bókaverðlaun barnanna. Bókin er tilnefnd til Fjöruverðlaunanna 2019 sem í flokki barna- og unglingabókmennta.

Nú snýr Fíasól aftur, tíu ára og kraftmeiri en nokkru sinni fyrr. Hún stofnar björgunarsveit sem berst fyrir réttindum barna, glímir við tuddana í bekknum og spilar stuðbolta.

„Fyrir hvaða aldur er þessi bók?“ spyr amma í bókabúð.
„Sjáðu til, amma,“ svarar Fíasól. „Þessi bók er fyrir alla sem hafa áhuga á börnum. Hún er fyrir barnalega fullorðna og fullorðinsleg börn. Hún er um sterka stráka og kraftastelpur.“
„Já, er þessi bók þá fyrir stelpur?“ spyr amman og skoðar stelpuna framan á kápunni.
„Nei, nei, alls ekki!“ svarar Fíasól. „Þetta er bók fyrir alla krakka af því að strákar og stelpur eiga heiminn saman.“

Bókin fæst innbundin og sem hljóðbók, sem er streymishljóðbók (Streymi) sem er afhent rafrænt og hægt er að hlusta á beint í gegnum app Forlagsins eða vafra.

Hljóðbókin er um 3 klukkustundir að lengd. Höfundur les.

Hér má hlusta á hljóðbrot úr fyrsta kafla streymishljóðbókarinnar.