Gunnar Randversson, tónlistarmaður, þýðandi og ljóðskáld, hefur sent frá sér dálitla bók sem ber heitið Gulur Volvo, en Tindur gefur út. Jólabókaflóðið okkar Íslendinga er afskaplega fjölbreytt og þessi litla bók er sérstæð perla í flóðinu. Sögurnar eru afar grípandi og hnitmiðaðar, fyndnar og sorglegar í senn:

„Þessar sögur eru skrifaðar á löngum tíma og fjalla allar um dauðann á einn eða annan hátt. Ein þeirra er til dæmis skrifuð árið 2004 og svo var önnur skrifuð í fyrra,“ segir Gunnar en sögurnar eru alls átta.

Missti föður sinn 11 ára gamall

„Ég fór að huga að útgáfu bókarinnar fyrir einu ári síðan og þegar ég las sögurnar yfir á ný þá sá ég að dauðinn dúkkaði upp aftur og aftur. Þetta er engin tilviljun. Pabbi minn dó þegar ég var 11 ára og móðir mín dó þegar ég var um tvítugt og þannig var ég rækilega minntur á það að lífið getur verið harður skóli. Ég hef samt aldrei sest niður og hugsað, „Jæja, nú ætla ég að skrifa um dauðann.“

En þó að dauðinn sé í sjálfu sér alvörumál þá er ekki þar með sagt að sögurnar séu drungalegar. Ég slæ öðru hvoru á létta strengi og hef fengið jákvæð viðbrögð frá fólki sem finnst sögurnar fyndnar.“

Aðalstarf Gunnars er tónlistarkennsla en hann er bæði menntaður píanóleikari og gítarleikari. Hann hefur gefið út ljóðabækur og fengist töluvert við ljóðaþýðingar, aðallega á norrænum skáldskap. Gulur Volvo er fyrsta prósaverkið eftir Gunnar. Bókin er til í flestum helstu bókaverslunum. Hún er ódýr og hentar ekki síst þeim sem langar til að gefa sjálfum sér glaðning og andlega hressingu á aðventunni um leið og þeir velja jólagjafir handa ástvinum.