Nokkur óánægja virðist komin upp hjá mörgum landsfundarfulltrúum Sjálfstæðisflokksins með ný fundarsköp landsfundarins, sem miðstjórn Sjálfstæðisflokksins samþykkti á fundi sínum 7. febrúar sl. Þykja fundarsköpin gera málefnanefndirnar nær áhrifalausar.
Óánægjan snýr að 3. kafla fundarskapanna, sem fjallar um meðferð og afgreiðslu ályktana á fundinum, en á landsfundi Sjálfstæðisflokksins starfa átta málefnanefndir og segja má að starf þeirra sé hryggjarstykkið í landsfundinum. Í nefndunum fer fram mikil og ítarleg umræða um þau ályktanadrög sem lögð eru fyrir nefndirnar og gjarnan gerðar talsverðar breytingar á þeim áður en þær eru sendar til endanlegrar afgreiðslu sjálfs landsfundarins.
Nú hefur miðstjórn samþykkt að þegar búið sé að afgreiða ályktunardrög frá málefnanefndum skuli þær lagðar fyrir almennan fund landsfundar „til afgreiðslu án umræðu“.
Hljóti drög ekki meirihluta atkvæða á almennum fundi landsfundar skulu upphafleg drög, sem Valhöll sendi inn til málefnanefndar borin undir atkvæði. Fái þau drög ekki meirihluta skal ályktun síðasta landsfundar, sem haldinn var árið 2022, gilda áfram í viðkomandi málaflokki.
Óánægja landsfundarfulltrúa snýst m.a. um það að ekki skuli leyfðar umræður um ályktanadrög á almennum fundi landsfundar en ekki síður nýtt vald sem kjörinn formaður málefnanefndar fær til að ryðja öllum breytingum sem samþykktar eru í málefnanefndinni út af borðinu áður en drögin eru tekin til afgreiðslu á landsfundinum sjálfum, þar sem engar umræður eru heimilar.
„Auk þeirrar málamiðlunar sem fundarstjóri málefnanefndar hefur heimild til að vinna að getur kjörinn formaður málefnanefndar ávallt flutt breytingartillögu á almennum fundi landsfundarins, um að texti ályktunar sé færður til þess horfs sem upprunalega var lagður fyrir fundinn af viðkomandi málefnanefnd og þannig horfið frá breytingum sem samþykktar hafa verið í málefnanefndum á landsfundi. Jafnframt getur almennur fundur landsfundar tekið málamiðlunartillögur kjörinna formanna málefnanefnda eða staðgengils hans til afgreiðslu með afbrigðum.“
Þarna þykir landsfundarfulltrúum miðstjórn flokksins hafa gengið of langt í að svipta fulltrúa á landsfundi og þátttakendur í starfi málefnanefnda lýðræðislegum rétti sínum til að hafa áhrif á stefnu Sjálfstæðisflokksins. Fundarsköpin þykja ólýðræðisleg og einn viðmælandi Eyjunnar orðaði það svo að með því að færa formönnum málefnanefnda vald til að sópa öllum samþykktum breytingatillögum við drög ályktana út af borðinu sé í raun óþarft að halda uppi starfi málefnanefnda á landsfundinum vegna lýðræðishalla hinna nýju fundarskapa. Sjálfstæðismenn kalla landsfund sinn jafnan lýðræðisveislu.
