Hilda Jana Gísladóttir, bæjarfulltrúi á Akureyri og fyrrverandi sjónvarpsstjóri á N4, hefur hrundið af stað nýju þriggja þátta hlaðvarpi um byggðaríg. Fyrsti þátturinn af Rígnum er kominn út, þar sem Hilda fer ofan í söguna á byggðaríg aftur í aldri og reynir að komast til botns í ástæðum hans og birtingarmyndum.

Í þættinum er rætt við Dag B. Eggertsson, fyrrverandi borgarstjóra í Reykjavík, sem telur að rígurinn á milli þéttbýlis og landsbyggðar sé byggður á djúpum grunni. Hann risti hins vegar ekki jafnt djúpt hjá almenningi í dag.

Bendir Dagur á að þéttbýlismyndun á Íslandi hafi verið gríðarlega hröð, hraðari en víðast hvar annars staðar. Á einni öld, frá 1915 til 2015, fór hlutfall íbúa í dreifbýli úr um 85 prósent í 15 prósent. Fólk hafi flykkst til bæjanna og sérstaklega á suðvesturhornið.

„Fjölgunin hefur fyrst og fremst verið hér og það er ekkert óeðlilegt að það taki svolítið í,“ segir Dagur. Ýmislegt hafi stutt við ríginn, í bókmenntum og menningu til dæmis. „Sollurinn og sukkið á mölinni en siðprýðin og öll lífsins gæði til sveita.“

Segir Dagur að þessi rígur sé svolítið djúpt í menningunni að einhverju leyti en eins og staðan sé núna hafi forsendur breyst.

„Mér finnst ákveðnar pólitískar freistingar hjá fólki til að reyna að kveikja og breikka þessa gjá sem ég held að sé ekki jafn djúp hjá öllum almenningi eins og var,“ segir Dagur.

Þáttinn má finna á bæði Spotify og Apple Podcasts.