„Stjórnmálamenn sem tala gegn bókun 35 virðast sumir ekki hafa áttað sig á að grunneðli EES-samningsins er að hann veitir einstaklingum og aðilum í atvinnurekstri aðild að sameiginlegum markaði ESB og þar með fyrst og fremst réttindi á þessum kjölfestumarkaði Íslendinga þar sem búa um 450 milljónir manna.“ Þetta skrifar Davíð Þór Björgvinsson, forseti lagadeildar Háskólans á Akureyri og fyrrverandi dómari við Landsrétt og Mannréttindadómstól Evrópu, í aðsendri grein á Eyjunni. Davíð hefur einnig gegnt prófessorsstöðum við lagadeildir Háskóla Íslands og Kaupmannahafnarháskóla.
Davíð segir að gæta þurfi þess fjöreggs sem innri markaður ESB sé fyrir Íslendinga og EES-samningurinn tryggi og rísa af heilindum undir þeirri ábyrgð sem því fylgi að fá að vera þar með. „Þeir stjórnmálamenn sem ala á tortryggni gagnvart ESS-samningnum, þar með talið bókun 35, tala að mínu viti gegn réttindum Íslendinga samkvæmt honum og þar með íslenskum hagsmunum. Þeir kjósa fremur vist í tjörukagganum með Þorgeiri Hávarssyni.“
Davíð segir suma stjórnmálamenn nota áskilnað um fullveldi landsins til að ala á tortryggni gagnvart EES-samstarfinu og „tala um skuldbindingar sem af honum leiða, eins og um sé að ræða óréttmætan yfirgang og afskipti erlends valds af innanlandsmálum Íslendinga. Litlu breytir þótt reglurnar í raun færi borgurunum, þ.m.t. launþegum, og íslenskum aðilum í atvinnurekstri, aðallega réttindi, þótt auðvitað fylgi því líka vissar skyldur, eins og öllum réttindum.“
„Ég hef áður sagt og endurtek hér að orðræða þessi minnti mig á söguna af Þorgeiri Hávarssyni þegar hann skreið upp úr tjörukagganum og Þórður jómsvíkingur strútharaldssonaskáld spurði hetjuna: „Hví ertu eigi geinginn við öðrum mönnum og ausinn vatni í tjöru stað?“ „Eg em íslenskur maður“, mælti Þorgeir Hávarsson „… og fýsir mig lítt að fara að siðum annarra manna“. (HKL Gerpla 25. kafli).“
Davíð segir lífssýn Þorgeirs Hávarssonar birtast m.a. í andstöðu við frumvarpið um innleiðingu bókunar 35, sem lagt var fram á síðasta ári en hefur enn ekki hlotið afgreiðslu. „Í frumvarpinu eru lagðar til breytingar á lögunum sem innleiða EES-samninginn til að fullnægja skuldbindingum Íslands samkvæmt bókun 35 við hann og setja reglu sem tryggir skýrum og óskilyrtum lagaákvæðum, sem réttilega innleiða skuldbindingu samkvæmt EES-samningnum, forgang fram yfir aðrar reglur íslensks réttar. Regla þessi um forgang ESB/EES-reglna er grundvallarregla í rétti sambandsins og EES-samstarfinu og byggir á þeirri einföldu hugsun að forsenda fyrir sameiginlegum markaði á sviði vöruviðskipta, þjónustu, fjármagnsflutninga og vinnuafls sé að sömu reglur gildi alls staðar á honum. Með EES-samningnum og bókun 35 gengust Íslendingar fyrir 30 árum síðan undir þá skuldbindingu að tryggja einmitt þetta. Það hefur ekki verið gert enn þá þrátt fyrir snuprur frá Eftirlitsstofnun EFTA, sem vel að merkja er stofnun sem Íslendingar áttu sjálfir þátt í að setja á fót og eiga fulla aðild að.“
Grein Davíðs Þórs í heild má lesa hér.
