Halla Hrund Logadóttir, fyrrverandi forsetaframbjóðandi og fráfarandi orkumálastjóri, útilokar ekki að taka þátt í stjórnmálum í framtíðinni. Halla er spurð út í þetta í Morgunblaðinu í dag en hún lætur af störfum sem orkumálastjóri um áramót þegar ný Orku- og umhverfisstofnun tekur við.

„Á mér brenna ýmis mál og fjöl­marg­ir hafa verið í sam­bandi við mig, bæði úr stjórn­mál­um og af öðrum vett­vangi,“ seg­ir Halla við Morgunblaðið í dag.

Í frétt blaðsins kemur fram að Halla hafi verið í „óformlegri umræðu fólks á meðal og gjarnan verið orðuð við pólitíska þátttöku“ eins og það er orðað. Halla þótti standa sig vel í forsetakosningunum og leiddi hún lengi vel í skoðanakönnunum. Hún endaði með 15,7% greiddra atkvæða.

Halla segir að engin ákvörðun hafi verið tekin um næstu verkefni, en eftir áramót heldur hún til kennslu við Harvard-háskóla í Bandaríkjunum.

„Hvað svo verður kem­ur í ljós með vor­inu. Það sem er fast í hendi er að framtíðin er spenn­andi og í henni vil ég leggja mitt af mörk­um til að landið okk­ar, auðlind­ir þess og sam­fé­lag allt dafni, eins og ég lagði áherslu á með for­setafram­boði mínu síðasta vor,“ seg­ir hún við Morgunblaðið.