Fyrir mistök voru fimm þúsund einstaklingar í fæðingarorlofi ranglega taldir starfsmenn ríkisstofnana í opinberum gögnum Hagstofunnar. Frá þessu greinir Bjarni Benediktsson, forsætisráðherra.

Þessi mistök komu fram í sérvinnslu sem Bjarni óskaði eftir í tilefni opinberra talna Hagstofunnar um umsvif á vinnumarkaði í júlí. Því liggur fyrir að fjölgun ríkisstarfsmanna var ofmetin samhliða lengingu fæðingarorlofs. Bjarni segir þessa villu vera hið versta mál sérstaklega þegar þær leiða til tilhæfulausrar umræðu um útþenslu hins opinbera.  Bjarni hefur nú komið að stað vinnu til að bæta opinbera hagskýrslugerð þar sem röng gögn geta stundum verið verri en engin.

Bjarni skrifar á Facebook:

„Fimm þúsund manns í fæðingarorlofi voru ranglega talin starfsmenn ríkisstofnana í opinberum gögnum Hagstofunnar. Ríkisstarfsmenn ofmetnir um 5.000 manns.
Þetta kemur fram í sérvinnslu sem ég óskaði eftir í framhaldi af opinberum tölum stofnunarinnar um umsvif á vinnumarkaði í júlí. Af þessu leiðir að fjölgun starfsmanna ríkisstofnana hefur verið ofmetin samhliða lengingu fæðingarorlofs.

Undanfarið ár hefur tæplega 90% fjölgunar á vinnumarkaði raunar verið í einkageiranum, þvert á það sem reglulega er haldið fram í opinberri umræðu. Hlutfallsleg fjölgun í einkageiranum og hjá hinu opinbera er nokkurn veginn sú sama – um 1%.

Villur í opinberum gögnum eru hið versta mál, ekki síst þegar þær verða grundvöllur umræðu um útþenslu hins opinbera sem enginn fótur reynist fyrir. Eða þegar hagvöxtur er vanmetinn um það sem nemur hagvexti í eðlilegu árferði.

Það er mikilvægt að fjölmiðlar og almenningur sýni stjórnvöldum aðhald þegar kemur að útþenslu hins opinbera. Aðhald í ríkisrekstrinum er enda yfirlýst forgangsmál okkar, til að styðja við áframhaldandi lækkun verðbólgu og vaxta. En þegar gögnin standast ekki skoðun, þá gerir umræðan það ekki heldur.

Á þeim grundvelli hef ég komið af stað vinnu til að bæta opinbera hagskýrslugerð. Röng gögn geta nefnilega verið verri en engin og þangað viljum við ekki fara.“