Orðið á götunni er að vandræðaástandi í ríkisstjórninni magnist nú dag frá degi. Við blasir að vantrauststillaga verði lögð fram á Svandísi Svavarsdóttur, matvælaráðherra, vegna þeirrar niðurstöðu Umboðsmanns Alþingis að hún hafi brotið bæði lög og meðalhófsreglu með fyrirvaralausu hvalveiðibanni í júní á síðasta ári. Einnig blasir við að ýmsir ráðherrar og þingmenn stjórnarflokkanna, fyrst og fremst Sjálfstæðisflokksins, hafa gefið til kynna að þeir kunni að styðja vantrauststillöguna.

Sjálfstæðismenn hafa sagst bíða viðbragða Vinstri grænna við áliti Umboðsmanns. Nú liggja viðbrögð Svandísar Svavarsdóttur fyrir og orðið á götunni er að þau uppfylli ekki þær væntingar sem sjálfstæðismenn höfðu.

Svandís segist ætla að láta óháðan aðila fara yfir stjórnsýslu og lagaumgjörð hvalveiða og fá álitsgjafa til að gera tillögur um úrbætur og nauðsynlegar lagabreytingar.

Orðið á götunni er að vart þurfi óháða úttekt á stjórnsýslu og lagaumgjörð hvalveiða vegna þess að þetta er einmitt það sem Umboðsmaður Alþingis fór yfir og komst, sem kunnugt er, að þeirri niðurstöðu að ráðherra hefði brotið lög og farið gegn meðalhófsreglu íslenskrar stjórnsýslu. Þá verði einnig athyglisvert hvaða álitsgjafa ráðherra hyggist fá til að gera tillögur um úrbætur – mun Svandís leita í smiðju Stefáns Pálssonar, samflokksmanns síns, eða jafnvel kalla til Ólafana úr Bítinu á Bylgjunni sem hafa verið mun gagnrýnni á embættisfærslur hennar en Stefán?

Þorbjörg Sigríður Gunnlaugsdóttir, þingmaður Viðreisnar, segir í færslu á Facebook að nú heyrist því fleygt að í stað þess að matvælaráðherra axli ábyrgð á lögbrotum sínum með því að taka pokann sinn, jafnvel þótt það yrði aðeins á milli húsa í stjórnarráðinu, verði hvalirnir látnir víkja úr matvælaráðuneytinu og fluttir í annað ráðuneyti. Þorbjörg Sigríður spyr hvaða lög blessaðir hvalirnir hafi brotið og veltir því fyrir sér hvort það muni duga þingmönnum Sjálfstæðisflokksins að hvalirnir fari frá Svandísi en ekki öfugt til að þeir verji ráðherrann í atkvæðagreiðslu um vantrauststillöguna.

Orðið á götunni er að farsinn í stjórnarráðinu og þingsölum nálgist nú hámark verði hvalirnir látnir axla ábyrgð á lögbrotum ráðherra.