Þegar Samfylking og Sjálfstæðisflokkurinn tóku undir málflutning Miðflokksins í útlendingamálum mátti merkja breytingar á fylgi allra flokkanna þriggja. Ris Samfylkingarinnar stöðvaðist og Sjálfstæðisflokkurinn fór að tapa fylgi á meðan fylgi Miðflokksins fór á flug. Eiríkur Bergmann, prófessor, telur að mögulega hafi ummæli formanna Sjálfstæðisflokksins og Samfylkingar veitt málflutningi Miðflokksins í málaflokknum lögmæti. Eiríkur er viðmælandi Ólafs Arnarsonar í hlaðvarpi Eyjunnar.
Eyjan - Eirikur Bergmann 3.mp4
„Það er annað orsakasamhengi sem ég hef staldrað við, og aftur set ég fyrirvara, ég veit ekki hvert orsakasamhengið er, en við sjáum það að bæði Sjálfstæðisflokkur og Samfylking fara svona í humátt á eftir málflutningi Miðflokksins í útlendingamálum, sérstaklega með tvennum ummælum formanns Sjálfstæðisflokksins, annars vegar þarna á tröppunum á Bessastöðum, og síðan varðandi tjaldbúðir Palestínumanna á Austurvelli, og svo viðtal Kristrúnar Frostadóttur þar sem hún breytir um stefnu Samfylkingarinnar í málefnum að komufólks,“ segir Eiríkur.
Hann segir að við þetta hafi ris Samfylkingarinnar stöðvast og aðeins fallið, fylgi Sjálfstæðisflokksins hafi byrjað að falla og fylgi Miðflokksins hafi rokið upp. „Þetta sjáum við koma saman nokkurn veginn í tíma og þetta finnst mér alveg rosalega áhugavert. Það er eins og ummælin hafi veitt málflutningi Miðflokksins lögmæti í eyrum fólks, og fólk fari að hugsa, ókei, það er þá kannski allt í lagi að kjósa á grundvelli þess að vera andsnúinn aðstreymi fólks. En þá kýs það ekki þá sem á eftir komu heldur upphafsmenn málsins.“
Þú ert sem sagt að segja að þessi stefnubreyting, áherslubreyting hjá Sjálfstæðisflokki og Samfylkingu, hún hafi í raun og veru veitt málflutningi og stefnu Miðflokksins trúverðugleika?
„Já, það er það sem ég er að segja. Eða ég er að slá því fram sem mögulegri tilgátu til þess að skoða, ég er ekki að slá því föstu að svo sé – ég tek eftir því að þarna varð breyting sem var önnur en kannski til var ætlað.“
Einnig er hægt að hlusta á Spotify.
