Ný skoðanakönnun Maskínu, sem kynnt var í hádegisfréttum Bylgjunnar, gefur til kynna að Katrín Jakobsdóttir og Halla Tómasdóttir séu nú hnífjafnar á toppnum, með marktækt meira fylgi en Halla Hrund Logadóttir. Halla Tómasdóttir eykur fylgi sitt verulega frá síðustu könnun Maskínu en Katrín tapar nokkru fylgi. Halla Hrund bætir við sig en bæði Baldur Þórhallsson og Jón Gnarr tapa fylgi.

Samkvæmt könnuninni eru Halla Tómasdóttir og Katrín Jakobsdóttir nú með 24,1 prósenta fylgi og Halla Hrund með 18,4 prósenta fylgi. Baldur er með 15,4 prósent og Jón Gnarr með 9,9 prósent.

Grétar Þór Eyþórsson, prófessor í stjórnmálafræði við Háskólann á Akureyri, segir nokkur tíðindi felast í þessari könnun. Hún bendi til þess að Halla Tómasdóttir hafi náð að rífa sig upp fyrir Höllu Hrund og Baldur, en í síðustu könnunum hafa þau öll verið í einum hnapp. Hann segir að með þessu sé að teiknast upp sú staða að þeir kjósendur sem ekki vilja Katrínu Jakobsdóttur sem forseta geti nú kosið taktískt, sem virtist ómögulegt þegar Katrín var efst og næstu þrír í einum hnapp.

Ekki er hefð fyrir því hér á landi að kjósendur kjósi taktískt, hvorki í forsetakosningum né öðrum kosningum, en samkvæmt könnunum virðist mjög stór hluti þeirra kjósenda sem ekki styðja Katrínu alls ekki geta hugsað sér hana sem forseta, en yfir 40 prósent svarenda hafa sagst ekki vilja Katrínu á meðan um 20 prósent vilja ekki Höllurnar eða Baldur.

Grétar segir að nú verði mjög áhugavert að sjá hvort könnun Gallups, sem birt verður fyrir kappræður forsetaframbjóðenda í Ríkissjónvarpinu annað kvöld, staðfestir þær línur sem birtast í könnun Maskínu. Einnig verði áhugavert að fylgjast með kappræðum frambjóðenda.