Nú, þegar fólk hefur fært sig í auknum mæli úr óverðtryggðum lánum í verðtryggð hefur dregið mjög úr biti vaxtatækis Seðlabankans. Snorri Jakobsson, hagfræðingur og eigandi Jakobsson Capital vitnar í Gunnar Jakobsson varaseðlabankastjóra og segir að þegar upp sé staðið sé ekki ýkja mikill munur á  því hvort greitt sé af verðtryggðu eða óverðtryggðu láni þegar upp sé staðið. Snorri er gestur Ólafs Arnarsonar í Markaðinum á Eyjunni.

Markadurinn - Snorri Jakobsson -2.mp4.mp4

„Það var náttúrlega mjög jákvæð þróun þegar fólk var að færa sig úr verðtryggðu lánunum yfir í óverðtryggðu lánin. Þá hafði Seðlabankinn mjög góða stjórn á því. En þessar síðustu vaxtahækkanir, þá varð eins konar öfugþróun. Fólk færði sig aftur yfir í verðtryggðu lánin,“ segir Snorri.

Hann segir þetta gera það að verkum að áhrif stýritækis Seðlabankans séu einfaldlega minni en ella. „Næmni verðtryggðra lána fyrir vöxtum er bara svo rosalega lítil.“

Snorri segir vextina vera svo lítinn hluta af láninu. „Eins og Gunnar Jakobsson benti á þá er ástæðan fyrir því að greiðslubyrðin er svona lág að þú ert að borga svo lítinn hluta. Stóri hlutinn er verðbólgan. Ef þú berð saman nafnvexti og reiknar svo saman verðtryggðu vextina ofan á verðbólguna þá ertu ekki endilega að borga neitt hærri vexti en ef þú værir að borga óverðtryggða vexti. Hann tók sögulegt tímabil og benti á það.“

Snorri segir Seðlabankann ekki eiga að vera í neinni vinsældakeppni. Erfitt sé að segja hvenær vextir séu orðnir of háir eða ekki en menn verði að átta sig á því að áhrifin af vaxtabreytingum séu lengi að koma fram.