Síðasta sumar skapaðist nokkur umræða um hjartavöðvabólgu og covidbóluefnin eftir að Kári Stefánsson viðurkenndi í viðtali að miðað við núverandi upplýsingar væri ekki ráðlegt að bólusetja fólk yngra en 40-50 ára. Ástæðan væri aukin tíðni hjartavöðvabólgu. Vegna haturfullra orða Kára áður í garð óbólusettra með að vilja flytja þá í Grímsey urðu eðlilega hörð viðbrögð við þessum viðsnúningi. Kári svaraði með að skrifa grein með starfsmanni sínum, Ingileifu Jónsdóttur, þar sem fyrri yfirlýsing var þynnt út og vísað á rannsóknir sem sýndu að hjartavöðvabólga vegna covid væri margfalt algengari en vegna bóluefna. Alvöru svar við þessari grein hefur aldrei komið fram.
Þetta getur nú breyst, því fimmtudaginn 4. apríl verður haldið málþing á Reykjavík Natura þar sem tveir frummælendanna eru virtir hjartasérfræðingar sem hafa síðustu þrjú ár rannsakað í þaula hjartavöðvabólgufaraldurinn sem hefur gengið yfir heiminn síðan þá. Þetta eru Dr. Peter McCullouch og Dr. Aseem Malhotra.
Sjálfur varaði greinahöfundur margoft við þessari hættulegu tilraun því strax í upphafi lágu fyrir gnægð upplýsinga um mögulega skaðsemi og gagnsleysi tilraunabóluefnanna. Bæði Kári og heilbrigðisyfirvöld voru þá í klappliði lyfjafyrirtækjanna og hunsuðu allar slíkar aðvaranir. Fyrir vikið eru afleiðingarnar nú smám saman að koma í ljós og munu á endanum blasa við öllum hvort sem menn vilja sjá eður ei.
En skoðum aðeins söguna. Hvað áttu menn að vita?
Einn óvenjulegasti og jafnframt skaðlegasti eiginleiki COVID-19 var hversu sýkingin lagðist á æðakerfi sjúklinga með veikt ónæmiskerfi, þar sem vírusinn hefur blóðtappavaldandi virkni. Þegar meðferðarúrræði þróuðust tóku þau mið af þessu og fyrir vikið var jafnvel talað um að COVID-19 væri í fyrst og fremst blóðrásarsjúkdómur. Áhugavert var því fyrir marga að vita hvort COVID-19 ylli líka hjartavöðvabólgu. Mest afgerandi rannsóknin var ísraelsk rannsókn frá 2020 á um 200.000 óbólusettum Ísraelsmönnum, sem sýndi að engin tengsl voru á milli covidsýkingar og hjartavöðvabólgu áður en bóluefnin komu á markað.
Rannsóknin sem Kári og Ingileif vísuðu í í sinni grein og átti að sýna að COVID-19 ylli hjartavöðvabólgu var gerð eftir að sprautuherferðin hófst. Meiriháttar breyta sem jók tíðni hjartavöðvabólgu hafði þannig bæst við og langflestir covidsjúklingarnir sem greindust með hjartavöðvabólgu voru því líka bólusettir. Annar meiriháttar galli, sem Dr. Peter McCullough hefur bent á, fólst í því að verið var að bera saman ósamanburðarhæfar mælingar. Mælingarnar sem mældu styrk niðurbrotsefnis frá hjartavöðvabólgu í blóði, sýna að jafnaði 10-100 falt hærri styrk vegna aukaverkana bólusetningar í samanburði við hjartavöðvabólgu sem ætlað var að orsakaðist af covid.
Erfitt er því að sjá að rök Kára og Ingileifar haldi vatni. Þegar bera á saman tvo mælihópa þarf eðlilega að mæla jafn oft í báðum hópum. Miðað við framantalið virðist einfaldlega sem hjartveiku covidsjúklinarnir hafi fengið hjartavöðvabólguna áður en þeir fengu covid.
Öll aukning á hjartavöðvabólgu er vegna bóluefnisins en ekki vegna covid.
Bólusetningar byrjuðu fyrst í Ísrael. Þar kom strax í ljós í febrúar 2021 að mikil aukning varð í tíðni hjartavöðvabólgu hjá ungum hraustum karlmönnum. Undir venjulegum kringumstæðum hefði slíkt kallað á stöðvun slíks tilraunalyfs, en það var samt ekki gert. Þess í stað var þessi aukaverkun þögguð niður þar til í júlí 2021 þegar íslensk heilbrigðisyfirvöld fyrst vöruðu við hjartavöðvabólgu sem aukaverkun og lýstu einkennunum. Mánuði síðar var búið að tilkynna um 10 tilfelli hjartavöðvabólgu og gollurhúsbólgu. Þar af voru 2 tilkynningar um hjartavöðvabólgur hjá börnum.
Tveimur dögum áður en bólusetningar barna hófust sendu tveir hjartalæknar frá sér blaðagrein þar sem þeir mæltu gegn tilraunabólusetningu barna. Áhættan vegna hjartavöðvabólgu var of mikil. Fyrir seinni bólusetninguna var greinahöfundur meðhöfundur í aðvörunargrein, þar sem við höfðum fengið veður af því að annað barnanna með hjartavöðvabólgu væri barn hjartalæknis [sem væri fyrir vikið sérfræðingur í að greina hjartavöðvabólgur]. Við töldum því verulega hættu á því að tíðni hjartavöðvabólga væru stórlega vanmetin.
Dr. Aseem Malhotra (einn frummælanda málþingsins 4. apríl) var áður fylgjandi bólusetningarátakinu, en um haustið 2021, breyttist allt þegar faðir hans lést úr hjartaáfalli eftir bólusetningu. Ein athyglisverðasta rannsókn sem opnaði augu hans var rannsókn frá nóvember 2021 á 566 hjartasjúklingum þar sem heilsa þeirra var vöktuð fyrir og eftir bólusetningu. Rannsóknin sýndi að bólusetningin olli mikilli bólguaukningu í hjarta í og meira en tvöfaldaði líkurnar á að sjúklingarnir yrðu fyrir alvarlegu hjartaáfalli næstu fimm árin. (líkurnar fóru úr 11% í 25%).
En hversu algeng ætli tíðni hjartavöðvabólgu hafi verið eftir bólusetningu? Þrjár rannsóknir (Tælandi, Tævan og Sviss) hafa verið gerðar til að meta tíðnina þar sem heilsa bólusettra er vöktuð m.t.t. hjartavöðvabólgu strax eftir bólusetningu. Þeim bar öllum saman og niðurstaðan er sláandi. 3% þeirra sem bólusetja sig fá mælanlegar skemmdir í hjarta vegna hjartavöðvabólgu.
Í svissnesku rannsókninni voru þátttakendur sérstaklega varaðir við því að stunda áreynslu rétt eftir bólusetningu. Ef fólk fær hjartavöðvabólgu getur slík áreynsla leitt til hjartaáfalls. Á þetta hefur Peter Mccullough bent í greiningu sem sýndi um tíföldun í aukningu á tíðni hjartaáfalla íþróttamanna eftir að sprautuherferðin hófst
Þá kemur að áskoruninni til þín kæri heilbriðisráðherra.
Mikið þarf til til að álitsgjafar þínir og embættismenn sem mest höfðu sig í frammi byrji að viðurkenna mistök sem kunna að hafa skaðað heilsu fjölda Íslendinga og jafnvel kostað mörg líf. Mesta sem má búast við er líklega yfirlýsing eins og Kári kom með, þar sem dregið er í land með sprautuæðið og lagst gegn sprautun yngra fólks (eins og gerst hefur síðan). Uppgjör og raunveruleg viðurkenning á mistökunum er hins vegar nauðsynleg ef lágmarka á skaðann sem er enn að eiga sér stað.
Ef 3% þeirra sem bólusetja sig fá hjartavöðvabólgu við hverja bólusetningu má gróft áætla að fjöldi Íslendinga sem fengið hafa slíkan skaða sé á bilinu 10-20 þúsund, þar af meira en 500 börn. Hætt er við að hluti af þessum hópi eigi eftir að þróa með sér alvarlegri og lífshættulega hjarðavöðvabólgu.
Þessi áhrif sjást nú um allan heim, þar sem tíðni hjartasjúkdóma hefur aukist verulega og upp er komin ný óskilgreind andlátsgreining, „skyndilegt dauðsfall fullorðinna“. Hér á landi er orðin greinileg aukning á að íþróttamenn eða jafnvel börn frá hjartaaðsvif, eða skyndileg andlát fólks sem fer í kalt bað meðan á bólusetningaátakið var.
Þó að skemmdir á vef hjartavöðva séu óafturkræfar, er hægt að gera mikið til að stöðva að vandamálin ágerist og versni. Enginn embættismaður eða álitsgjafi sem stóð að baki þessari óheillavegferð með heilsu landsmanna mun nokkurn tímann koma til þín kæri heilbrigðisráðherra og viðurkenna slík mistök af sjálfsdáðum. Þvert á móti, er veruleg hætta á yfirhylmingu skaðans í lengstu lög, eða þar til afleiðingarnar eru orðnar það útbreiddar að engum dylst lengur hvað gerðist. En slík bið mun verða þjóðinni dýr því það mun kalla á fórnir að bregðast ekki við eins fljótt og auðið er.
Þó einhverjir kunni að kalla slíka yfirhylmingu glæp, þá er til stærri glæpur. Að hlusta ekki.
Gríðarlegir hagsmunir liggja að baki því að upplýsingar um skaðsemi bóluefnanna komi ekki fram og nánast hver einasti vísindamaður sem hefur þorað að stíga fram hefur þurft að fórna starfsframa sínum bara fyrir það eitt að tala fyrir eigin sannfæringu. Þegar slíkir einstaklingar koma fram þá skuldum við þeim að hlusta svo fórn þeirra verði ekki til einskis.
Ég skora því á þig kæri heilbrigðisráðherra að mæta á kynninguna og heyra hina hlið málsins. Ekki er seinna vænna.
