Hinn vinsæli, en þó umdeildi, skemmtiþáttur Vikan með Gísla Marteini er á dagskrá í kvöld, eins og aðra föstudaga, en gestalisti þáttarins hefur vakið talsverða athygli í ljósi þess að tveir einstaklingar undir hinum svokallaða feldi mæta í sófann.
Á föstudagsmorgnum birtist yfirleitt tilkynning um gesti þáttarins á samfélagsmiðlum RÚV sem einhverra hluta vegna er sjaldnast tekið fagnandi af fylgjendum stofnunarinnar. Yfirleitt keppast margir þeirra nefnilega við að lýsa því yfir að það sé ekki sjéns að horft verði á þáttinn eða þá að kvartað sé yfir því að það sé alltaf sama fólkið sem mæti.
Það gilti að sjálfsögðu um gesti þáttarins í kvöld en áhugafólk um forsetakosningar rak þar upp stór augu.
Meðal gesta er nefnilega Jón Gnarr, fyrrum borgastjóri, sem lýst hefur því reglulega yfir að hann íhugi alvarlega forsetaframboð. Það hefur orðið til þess að sá orðrómur flýgur nú fjöllum hærra að hann muni jafnvel lýsa yfir framboði í þættinum.
Það er þó ekki óþekkt að þáttur Gísla Marteins sé nýttur til þess en frægt varð þegar sjónvarpsmaðurinn Einar Þorsteinsson stökk í framboð fyrir Framsóknarflokkinn í beinni útsendingu hjá félaga sínum. Gafst það nokkuð vel enda Einar borgarstjóri í dag.
Þá vekur einnig athygli að Halla Hrund Logadóttir, Orkumálastjóri, er meðal gesta hjá Gísla en stuttu eftir að það var tilkynnt birtist frétt á Vísi um að hún lægi einnig undir feld og hefði fengið margar áskoranir um framboð. Spurning er því hvor verði fyrri til í þættinum, Jón eða Halla Hrund að bjóða sig fram!
Látið var að því liggja á sínum tíma að framboð Einars hefði komið RÚV-urum í opna skjöldu á sínum tíma en óvíst er hvernig sú skýring heldur ef af framboði verður í kvöld.
RÚV segist leggja mikla áherslu á hlutleysi þegar kemur að kosningabaráttum en ef svo væri að vinsælasti skemmtiþáttur landsins yrði aftur nýttur sem framboðsstökkpallur fyrir suma þá verður skugga varpað á þær fullyrðingar.
