Samkeppniseftirlitið hefur tilkynnt að það muni leggja 3,5 milljóna króna dagsektir á Brim hf.
Nú stendur yfir rannsókn stofnunarinnar á stjórnunar- og eignatengslum fyrirtækja í sjávarútvegi.
Við rannsóknina er stuðst við gagnagrunna á vegum hins opinbera og upplýsingar frá sjávarútvegsfyrirtækjum. Í tilkynningunni segir að send hafi verið bréf með beiðnum um upplýsingar til sjávarútvegsfyrirtækja landsins og langflest hafi þau tekið vel í beiðnirnar og sent umbeðnar upplýsingar. Í nokkrum tilvikum hafi þó verið gerðar athugasemdir við athugunina og upplýsingar veittar með fyrirvara af þeim sökum.
Eitt fyrirtæki, Brim hf., hafi þó hins vegar ekki enn veitt mikilvægar upplýsingar og gögn sem óskað var eftir sem hafi óhjákvæmilega tafið rannsóknina.
Eftir ítrekuð bréfaskipti segist Samkeppniseftirlitið nú hafa tekið ákvörðun um að nýta sér heimild sem kveðið er á um í 38. grein samkeppnislaga til þess að beita Brim hf. dagsektum. Þannig er Brim gert að greiða dagsektir að upphæð 3.500.000 kr. á dag, þar til umbeðnar upplýsingar og gögn hafa verið afhent.
Byrja dagsektirnar að reiknast eftir að fjórtán dagar eru liðnir frá ákvörðun um hana, í samræmi við 39. grein samkeppnislaga.
Segir enn fremur í tilkynningunni að Brim og Guðmundur Runólfsson hf. hafi gert athugasemdir eða fyrirvara við athugunina og gagnaöflun á grunni hennar. Einkum sé gerð athugasemd við að Samkeppniseftirlitið og matvælaráðuneytið hafi gert samning sem veiti eftirlitinu fjárhagslegt svigrúm til þess að ráðast í athugunina. Í athugasemdum fyrirtækjanna sé meðal annars leitt að því líkum að samningurinn dragi úr sjálfstæði Samkeppniseftirlitsins.
Vill Samkeppniseftirlitið meina að svo sé ekki. Í lögum sé kveðið á um það hlutverk Samkeppniseftirlitsins að kanna stjórnunar- og eignatengsl í íslensku atvinnulífi og skrifa um það skýrslur. Þá grundvallist gagnaöflun eftirlitsins á skýrum heimildum í 19. grein samkeppnislaga.
Í samningnum sé kveðið skýrt á um að hann raski ekki sjálfstæði Samkeppniseftirlitsins í úrlausnum sínum. Þá feli athugunin hvorki í sér ákvörðun um íhlutanir á grunni samkeppnislaga eða ákvörðunum um frekari athuganir, heldur miði verkefnið einvörðungu að því að gera eftirlitinu kleift að birta skýrslu í samræmi við samkeppnislög. Með þeim hætti sé stuðlað að auknu gagnsæi um eigna- og stjórnunartengsl í undirstöðugrein í íslensku atvinnulífi.
