„Vandamálið með Íslendinga er að þeir kunna margir ekki að vera ríkir, þeir fara svo illa með það. Það er vandi að vera ríkur,“ segir Brynjar Níelsson sem er gestur Ólafs Arnarsonar í hlaðvarpi Markaðarins á Eyjunni. „Sérstaklega verður að huga að því i svona fámennu samfélagi. Ekki berast of mikið á og ekki vera með stæla og mynda sig á einhverjum skútum og svoleiðis. Hógværð í þessu hjá auðugu fólki er bara mjög mikilvæg.“

Markaðurinn: Brynjar Nielsson 2

Brynjar segir okkur eiga að fagna því að einhverjum fyrirtækjum gangi vel. „Það sem skiptir máli er að við fáum öll tækifæri, getum menntað okkur.“ Svo komi bara í ljós hverjir taki áhættuna og uppskeri eftir því.

„Ef ég væri ungur maður í dag að fara að kjósa myndi ég spyrja mig: Hver er að berjast fyrir öflugu atvinnulífi fjölbreyttum störfum. Þar eru mínir möguleikar; að við höfum úr einhverju að velja. ekki að við séum bara hérna með Ríkisútvarp og ÁTVR og höldum að ríkissjóður sé ótæmandi auðlind,“ segir hann.

Brynjar segir niðurstöður næstu kosninga munu ráðast mikið af því um hvað verði kosið. Ef kosið verði um öflugt atvinnulíf sé ekkert því til fyrirstöðu að Sjálfstæðisflokkurinn vinni hér stórsigur. Hann sér allt eins fyrir sér að Sjálfstæðisflokkur og Samfylking, undir nýrri forystu með breyttar áherslur, geti átt samleið í ríkisstjórn eftir næstu kosningar.