„Eina sem getur komið í veg fyrir að ríkisstjórnin liðist í sundur á haustmánuðum er stjórnarandstaðan. Ef þingmenn stjórnarandstöðunnar koma til þings og byrja að keppast við að ráðast á ríkisstjórnina vegna ágreinings stjórnarflokkanna og allra vandræðamálanna gæti það þjappað stjórnarflokkunum saman,“ skrifar Ólafur Arnarson í nýjum Náttfarapistli á Hringbraut.
Ólafur segir fjölda vandræðamála fyrir ríkisstjórnina krauma og upp úr gæti soðið hvenær sem er í haust nema stjórnarandstaðan fari fram með svo miklum látum og offorsi að stjórnarflokkarnir þjappi sér saman og slíðri sverðin. Telur hann ekki ómögulegt að það verði niðurstaðan.
Að sögn Ólafs eru í hópi stjórnarandstæðinga einstaklingar sem láta kappið oft ráða málflutningi sínum. Nefnir hann Þórhildi Sunnu Ævarsdóttur og Björn Leví Gunnarsson úr Pírötum, Ingu Sæland úr Flokki fólksins, Helgu Völu Helgadóttur úr Samfylkingunni, Bergþór Ólafsson, Miðflokki, og Sigmar Guðmundsson í Viðreisn sem dæmi.
Að mati hans er það skynsamlegasta sem stjórnarandstaðan getur gert að mæta til þings af yfirvegun og láta stjórnarþingmenn takast á af þeirri heift sem einkennt hefur umræðu þeirra á milli nú í sumar.
Af nógu er að taka þegar vandræðamál, sem skapa úlfúð og klofning innan ríkisstjórnarliðsins, eru týnd til. Mikil reiði er í Sjálfstæðisflokknum vegna hvalveiðibanns Svandísar Svavarsdóttur, matvælaráðherra, og nú hefur fengist staðfest að Katrín Jakobsdóttir, forsætisráðherra, var í ráðum með Svandísi í því máli. Íslandsbanka- og Lindarhvolsmálin, einhver ljótustu hneykslismál síðari ára, eru sem myllusteinn um háls fjármálaráðherra, auk þess sem virkjanamál og óánægja með takmarkaðan strandveiðikvóta eru ekki til að bæta andrúmsloftið á stjórnarheimilinu.
Orkuskiptin eru í uppnámi og Ísland stendur ekki við skuldbindingar í loftslagsmálum. Þá eru Vinstri græn ósátt við dómsmálaráðherra vegna vopnavæðingar lögreglunnar jafnframt því er hver höndin upp á móti annarri vegna útlendingalaga og málefna hælisleitenda.
Upp á síðkastið eru þær raddir orðnar háværar innan Sjálfstæðisflokksins sem telja stjórnarsamstarf við VG fullreynt og vitnar Ólafur í grein Brynjars Níelssonar þar sem hann gagnrýndi þingmenn og þó sérstaklega ráðherra flokksins fyrir undanlátssemi og linkind gagnvart framgöngu VG og kallar eftir stjórnarslitum verði ekki breyting á.
Heilræði Náttfara til stjórnarandstöðunnar virðist sótt í herkænskubók Napóleons Bonaparte, sem sagði eitt sinn eitthvað á þessa leið: Aldrei trufla andstæðinginn þegar hann er að gera mistök.
Náttfara í heild má lesa hér.
